Domestik turisim campaign i leftemap sales

Vanuatu Tourism Office i talem se fes pat blong domestic turism campaign i bin help blong inkrisim sales blong ol turism bisnis long avrej blong 18 pesen.

Vanuatu Tourism Manager Marketing Communications Digital Assets, Nick Howlett, i talem se “Maybe hem i no inaf blong karem bak mani we oli bin lusum long stat blong COVID-19 mbe hem i wan stat.”

Fes pat blong domestik turism campaign blong Vanuatu hem i bin stat long en blong Julae kasem September mo hem i tru long fesbuk.

Campaign ia hem i kam in blong stimulatem dimand blong ol lokol turism bisnis.

Mr Howlett i talem se hem i no jas wan maketing campaign blong domestik turism mbe blong benefitim everi bisnis long taem blong COVID mo afta.

“Everi preperesen mo maketing we mifala i mekem bae i givhan long ol bisnis long fiuja. Hem i no jas ol bisnis be ful Vanuatu turism destinesen.”

Hem i talem se long ol fidbak we oli bin karem long ol turism bisnis long Luganville, ol bisnis ia i talem se oli stap mekem gud tumas long domestik turism.

Mr Howlett i talem se domestik turism hem i no blong ol travela we oli kam long Santo from Vila nomo.

“Domestik turism hem i everiwan we oli stap insaed long Vanuatu we taem oli ko spel samples o ko luk famili. Mo tu ol pipol we oli wok blong kavman o ol bisnis man taem oli stap travel i ko long ol difren pat blong kaontri.”

Hem i talem se i gat plante domestik travela raon long Vanuatu. I no plante olsem ol intanasanal travela. Mbe hem i stil plante mo hem i impoten tumas blong Vanuatu i divelopem domestik turism blong sapotem ol lokol bisnis espeseli long taem blong COVID-19.

Mr Howlett i talem se hem i tru se sam man i nogat mani mbe ol man we oli gat wok mo bisnis oli gat mani.

Hem i talem se oli bin mekem wan domestik turism dimand survey i no longtaem i pas. Risal blong survei ia i soem se i nogat tumas difrens wetem ol expatriate mo ol najuralise citizen mo man ples long saed blong spending blong olgeta. Everiwan i spend i semak nomo.

Hem i talem se from i nogat aweanes long wanem i available long turism maket blong Vanuatu mo amas kost blong ol samting, i mekem se pipol oli talem se oli nogat mani blong travel olbaot long kantri mo spend.

“So long seken pat blong domestik turism campaign bae mifala i introdusum long ol pipol idea blong ko aot mo spendem sam mani blong olgeta, long ol lokoli own bisnis. Spendem mani long ol wei we hem i no sas tumas mbe long wei blong sapotem ol bisnis ona blong yumi,”Mr Howlett i talem.

Hem i talem se wan long ol gudfala fidbak we oli bin kasem tru long campaign ia, hem i tat plante man i kam blong luk mo save sam lokol turism bisnis we oli stap long kaontri.

“Hem ia hem i impoten tumas, hem i soem se plante pipol i no fuli awea long wanem nao ol eksperians we oli aveilebol mo posibol.

“So pat blong wok blong mifala olsem ol maketa hem i blong mekem sua se ol man i kasem savei long ol turis eksperians we i stap,” hem i talem.

Mr Howlett i talem se from hem ia, oli stap operetem naoia kasem en blong yia ol fri bus seves long Santo mo Efate i ko long ol turism sites, olsem ol blue hole mo ol akomodesen.

Hem i talem se wan risen wae oli stap mekem hem ia, hem i blong mekem i afodebol mo introdusum long ol pipol ol difren eksperians we maet oli no bin tingbaot blong mekem bifo.

Mr Howlett i talem se fes pat blong campaign ia hem i bin rijim ful populesen blong Vanuatu tru long fesbuk.

(Visited 33 times, 1 visits today)

About The Author

You might be interested in