Electoral ofis i priperem Tafea long provinsiol eleksen

Ol ofisa blong Electoral ofis mo Civil Status i stap long Tafea provins long wik ia blong jekem ol electoral mo National ID kad blong ol pipol bifo provinsiol eleksen long May.

Electrol Komission i talem se deit we ol pipol blong Tafea bambae i ko long eleksen blong jusum ol kaonsela blong olketa hemi long namba 12 May 2020.

Etienne Ravo, Coordinator blong Civil Voter Registra, i talem se evri sitisen blong Tafea i wan mas blong kat wan National ID mo electrol kad blong vot long namba 12 May.

Hemi talem se wok ia bae i difren.

“Wok we bambae yumi mekem, i no olsem festaem from festaem yumi beis long ol polling station mo jekem ol kad ia,” Mr Ravo i talem.

“Naoia bae ol fil woka oli ko aot long ol komuniti blong jek long ol birth certificate wetem electoral mo National ID kad.

Eria secretary blong Aniwa, Lenon Nauka, i talem se bambae oli komplitim ol wok ia bifo en blong wik ia.

“Wok i stap ko hed naoia blong visitim wan wan haus blong jekem tufala impoten dokumen ia,” Mr Nauka i talem.

Folem deit blong Polling dei blong Tafea Provins, Civil status mo Election ofis i stap ranem ol trening long ol fil woka bifo oli statem jek list long wok ia.

Mr Ravo i talem se long Hed kwota blong Tafea Provins long Tanna, trening i stap tekem ples blong pripea from eleksen.

Long Futuna Eria Secretary, Toka Iatipu i talem se trening i stap tekem ples tedei bifo oli statem wok tumoro i ko.

Mr Ravo i talem se long Erromango, ol fil woka i stap mekem jekem naoia ol kad blong ol pipol.

Hemi talem se long Aneityum, wok bae i ko hed long nekis wik.

Term blong ol kaonsela blong Tafea provins bambae i finis long en blong manis March 2021.