Emergency alert system blong sik outbreak

Vanuatu i kat wan emergency alert system blong dil wetem eni sik outbreak.

Kavman hemi lonjem alert system we bae i save givim aot long pablik wanem kaen categori kaontri hemi fesem sapos i gat outbrek blong COVID-19 o eni sik.

Director blong Pablik Helt, Len Tarivonda, i talem se Ministry bai i yusum ol difren alert level stat long zero kasem tri blong categorisem risk blong wan sik outbreak long kaontri.

Hemi talem se ol alert level ia bai oli stap kivim out semak olsem woning we Meteo Ofis i stap kivim long taem blong saeklon.

Mr Tarivonda i talem se system ia hemi wan mileston blong Kavman wetem ol rispons plan blong COVID-19.

“Yumi wantem se pipol i rili andatanem ol wanem kaen system ia i stap blong futja blong bae oli save wanem risk eria o kaontri i stap long hem olsem hemia blong saeklon we i kat ol difren alert kala,” Mr Tarivonda i talem.

“So hemia i impoten from long las yia yumi kat wan o tu keis blong COVID mbe yumi putum lok daon long ful kaontri o provins.

“Tul ia bambae i helpem yumi blong asesem gud risk mo olsem mi talem blong kivim stret infomesen long pablik inline wetem risk mo wanem kaen aksen oli nid blong tekem blong protektem olgeta from sik ia.

Alert level zero i minim se risk blong COVID – 19 o eni sik i low mo i nokat wan kes blong sik ia long kaontri, level 1 i minim medium mo i minim se i gat wan kes long boda, level 2 hemi minim se risk i hae mo i gat wan local konfem kes mo level 3 i minim se risk i hae tumas long kaontri mo i gat komuniti transmission.

Minister blong Health, Sailas Bule nao wetem Acting Commissioner blong Australia long Vanuatu, Clemency Oliphant nao tufala i ofisiol lonjem impoten system ia.

Vanuatu hemi fes kaontri long pasifik we i gat outbreak alert system ia apat long Australia mo New Zealand.