Enfosmen blong labour loa i mas hapen

Vanuatu National Workers Union i wantem luk moa enfosmen long ol loa blong ol wokman.

George Firiam long Vanuatu National Workers Union i talem toktok ia taem Vanuatu i selebretem World Labour dei we International Labour Organisation i putum blong tinkbaot ol strakel mo sakses stori blong ol wokman truaot long wol.

Mr Firiam i talem se Labour Dipatmen i mas enfosem ol loa blong sapotem ol wokman from hemi duti blong olgeta.

“Minista blong Internal Affairs, i bin pointem aot se i kat violens mo arasmen long ol wok ples mo hemia i tru,” Mr Firiam i talem.

“Mbe Kavman i mas mekem wan samting abot ol isu olsem.

“Yumi mas mekem wan aksen akensem from fulap wokman i fesem ol kaen situasen olsem espeseli long private sekta.

“Sam long ol wokman, oli no kasem gud pay o oli wok ovataem mbe oli no pem olgeta.

“Labour dipatmen i mas luksave ol eria blong hem mo akt.”

Labour Commissioner, Murielle Metsan Meltenoven, i talem se event olsem i blong kontinu blong promotem raet blong ol wokman.

“Yumi unaetem pipol long sosel mo ekonomik advansmen hemi theme blong labour dei blong yia ia,” Mrs Meltenoven i talem.

“COVID-19 i kam mo i jenisim evri fasin blong wok mo i impoten blong kavman mo ol stekholda blong hem i mas wok tuketa blong adresem ol isu.

“Yia ia bae hemi wok tuketa blong traem adresem ol isu we i stap afektem ol wokman blong yumi long Vanuatu mo ovasi.”

Minista blong Internal Affairs, Honoroble Ismael Kalsakau, i talem se kavman hemi fuli komitim hem wan blong rispektem mo advocate plante long ol raet blong ol wokman blong Vanuatu.

“Mi tekem taem ia tu blong aploadem ol seasonal wokman blong Vanuatu we oli stap wok ovasi olsem ol ambassador blong Vanuatu,” Minista Kalsakau i talem.

“Ol wokman ia oli stap helpem ol fama ovasi blong holdem taet economi blong Australia mo New Zealand.

“Ol grup blong ol wokman we oli strakel blong earnem living blong olgeta hemi seasonal wokman long Australia mo New Zealand.

“Kavman blong Vanuatu i no save talem tankiu enaf long ol wokman blong hem we oli displayem ol skil mo save olsem ol ambassador blong kaontri.”

Labour Dipatmen i selebretem Labour dei long yia ia blong festaem long Port Vila.

 

 

 

 

 

 

 

 

 

 

 

 

 

 

 

 

(Visited 551 times, 1 visits today)

About The Author

You might be interested in