Eton Jif-Lisen long instraksen

Wan jif i kol blong rispektem ol toksave we ol bij owna i givim taem oli ko long long eria blong swim.

Jif blong Oneitap eria long Eton, Efate, Harris Kalskar, i talem toktok ia folem ded blong tu yangfala boy long wiken long eria blong hem.

Jif Kalskar i talem se taem pipol i lisen long instraksen bae oli no save kasem problem.

Hemi talem se naoia oli stap rere long ol saen bod blong putum long denja mo ol tabu ples.

“Taem grup ia i kam long haos long Sunday, mi talem long olgeta se yufala i ko rus mo spel andanit long ol tri mo wajem ol pikinini i stap swim,”Jif Kalskar i talem.

“Mi talem long olgeta se long narasaet blong solwota bae yufala i no long hem from hemi ples we wan man i bin swim mo ded lem. Plesia mifala i singaotem Ben Garae from hemi ples we taet i bin pulum hem. Mo hemi tabu.”

Jif Kalsakar i talem long VBTC Nius se hemi sapraes blong luk se tufala yang boy ia i swim i ko long tabu eria ia.

“Taem fes ded i hapen long yia 2000 hemi distebem mi long projek ia, ale mekem se mi nomo alaoem ol man oli ko swim ia,” Jif Kalsakar i talem.

“Sapos yufala i lukluk i nokat eni saen long rod.

“Mifala i jes stap insaed long wan kos blong tourism blong klinim eria mo mekem gud.”

Jif Kalsakar i admitim se hemi bin fail blong putum wan saen bod mo wan saen bod  i stap long plan.

Wan yut long Eton vilij, Russel Kalsei i kleim se fulap man long town oli no rispektem ol bij ia, mo i save gat ol inciden olsem i hapen.

“Mbe bifo ol pipol i kam swim, yu mas askem evri instraksen blong bae mifala i givim long yu, mbe sapos yu kam blong swim nomo mbe afta yu disaed blong diva bae problem ia nao.”

Deputy Director Coastal blong Fisheries, Sombert Gereva, i talem se inciden ia hemi rileit long wanem oli singaotem, Rip current.

Mr Gereva i explenem ol difren taet blong solwota long coast blong Eton we i difren long ani narafala eria long Vanuatu.

“Tide long Eton, hemi expos bigwan long saot east trade wind, i mekem se taet long plesia, nomata solwota hemi save kwaet, mbe i kat ol strong taet we oli flo long ol taem mo i dipen long situasen blong wota we i stap insaed mo influens ocean we i stap outsaed,”Mr Gereva i talem.

Jif Kalsakar i talem sori bigwan long ol famili blong tufala boy ia.

Eria ia long Eton i kat tri pipol nao i ded long hem long solwota blong Efate.

 

(Visited 2293 times, 1 visits today)

About The Author

You might be interested in