Export awenes long Malekula

Awenes blong National Export i stap kohed long Malekula.

Dipatmen blong Indastri i bin stap mekem aweanes ia long aelan blong Malekula.

Tim i bin stap tokbaot National Export Development Program long olgeta fama long Malekula mo involvem olgeta long program.

Acting Manager blong Marketing mo Promotions long Dipatmen blong Indastri, Donald Pelam, i talem se oli bin rijistarem sam taro fama blong fulmap nekis tu kontena blong expotem i ko long New Zealand Market.

Hemi talem se ol fama oli soem intres bigwan.

“Reaction blong olgeta fama long taem ia, oli rili hapi blong pat long program blong export,” Mr Pelam i talem.

“Oli jes talem nomo se oli nosave wet mo oli wantem pat long program ia kwiktaem.

“Hopfuli i kat sam ples long Malekula we bae yumi stat wok wetem ol fama mbe ol nara wan buyer i save pem olgeta prodak blong olgeta long nekis yia.”

Mr Pelam i enkarejem ol fama blong kontinu blong wok kolosap wetem dipatmen blong indastri.

“Olgeta fama we bae mifala wok wetem olgeta long yia ia, bae oli mas kontinu blong wok kolosap wetem ol provincial ofisa long wan wan provins blong mifala save se ol prodak blong olgeta bae i redi long wanem taem,” Mr Pelam i talem.

“Mo sapos oli nidim asistens, mifala i save wok wetem olgeta.”

Aweanes ia i bin hapen long Sanma mo bae i ko tu long ol nara aelan long Malampa mo ol nara provins long kaontri.

National Export Divelopmen program hem i bin lonj long las yia 2020 wetem aim blong Vanuatu i expotem lokol kakae i ko ovasi.