Extra 14 dei blong filem anual riten ripot

Vanuatu Ombudsman Ofis i givim 14 dei bageken blong wan lida i mas filem Annual Return Report blong hem.

Sins March 1, las dei blong filem ripot, ofis blong Ombudsman i risivim 276 Anual Return Report nomo aot long ova 700 lida long Vanuatu.

Ombudsman blong Vanuatu, Hamilson Bulu, i talem se hemi wan rikwamen anda long loa blong givim nara 14 dei notis olsem grace period blong ol lida i mas filem ripot.

“Mi kol long yumi ol lida, plis hemi wan rikwamen blong loa; Yu mekem duti blong yu, yu fulumap anual riten ripot blong yu wetem stret infomesen,”Mr Bulu i talem.

“Mesej i ko long evriwan sapos yu save ol lida blong yumi, hemi gud blong yu jek wetem hem blong mekem sua se hemi filem.”

Aot long ova 700 lida long kaontri, 442 lida oli no sabmittim yet annual riten.

Mr Bulu i talem se Ombudsman i kat pawa we Constitution o mama loa i givim long hem blong putum lida ia long Court.

“Wan lida bambae hemi justifyem long Kot, from wanem nao hemi no filem Annual Return Report blong hem,” Mr Bulu i talem.

“Kot nao bambae hemi fanem aot se lida ia hemi guilti o nokat.  Sapos lida hemi guilty, bae kot hemi jajem hem mo kamap long penalti.

Mr Bulu i talem se wan lida hemi save pas long kot tu sapos hemi filem kiaman information.

Long manis ia bae kot hemi jajem sam long ol lida we i bin fail blong filem annual return blong olgeta blong 2020.

(Visited 555 times, 1 visits today)

About The Author

You might be interested in