Faev pipol blong Solomon Islands i no kasem COVID-19

Faev pipol blong Solomon Islands we oli flaot long solwota blong wan manis mo ko shoa long Maewo oli tes negativ long COVID-19.

Vice Chairman blong COVID-19 Seaport Task Force, Obed Manwo, i konfemem toktok ia long VBTC Nius.

Mr Manwo i talem se tim blong lab long Vila Central Hospital i bin testem olgeta mo resal i soem se oli nokat virus blong COVID-19.

“Gudfala resal ia i mekem se tru long protocol blong COVID-19, yumi bin advasem Director blong National Disaster Management Office, Abraham Nasak, blong hemi kivim apruvol se ol faev pipol blong Solomon Islands ia i klia long virus ia,” hemi talem.

“Mo hemia blong talem se oli kam nomol olsem yumi.

“Olgeta pipol blong Maewo tu oli bin kasem awareness blong oli nomo fraet afta we ol pipol ia oli ko shoa long ples blong olgeta.

“Mo yumi tu long Vila yumi no mas fraet from oli bin spendem wan manis long solwota we i bitim 14 dei blong kwarentin mo hemia oli oraet.”

Father Joseph Gavea, wan long olgeta pipol we i bin drift long solwota, i talem se oli bin folem wan merikol travel long solwota.

Hemi talem se hemi biliv se Papa God i ansarem prea blong olgeta.

“Bae mi talem se blong flaot ia long solwota hemi wan spesel wan from blessing blong Papa antap i mekem mifala i kasem aelan blong Maewo,” Father Joseph Gavea i talem.

Budley Sinalau, Program Manager blong Australian High Commission long Vanuatu, i talem se hemi wan taem blong sherem sori taem hemi bin ko visitim ol wantok blong hem long Vila Central Hospital.

Hemi talem se ol faev pipol blong Solomon Islands ia oli glad taem oli luk hem.

“Mi kam storian wetem olgeta blong mekem oli no tinktink mo wari tumas,” Mr Sinalau i talem.

“Hemi bin wan jalenj taem blong olgeta from oli no kakae blong longtaem mbe prea nao i mekem oli laef i stap.”

Spokespersen blong COVID-19, Russel Tamata, i talem se naoia Ministry blong Foreign Affairs blong Vanuatu i stap wok wetem Ministry blong Foreign Affairs long Solomon Islands blong wan repatriation flaet.

Hemi talem se technikol Advisori tim i konfemem se samtaem long wik ia, bambae oli handem ol famli ia i ko long komiti blong Solomon Islands.

“Kavman i ripatriatem olgeta pipol ia long aelan blong Maewo long en blong las manis February i kam long Port Vila blong mekem test blong COVID-19,” Mr Tamata i talem.

“Travel arenjmen blong faev pipol blong Solomon Islands ia, kavman tru long teknikel advaesori tim i pem kost blong hem.