Fama i winim vatu long doa step

Wan Eria Administrata i talem se fasin blong pem lokol kakae long aelan hemi drim kam tru blong ol fama long rurol eria from maket.

Gerald Tamau, Eria Administrata blong Saot West Malekula, i talem se jalenj blong ol fama long rurol eria hemi akses blong maket blong salem produs.

Hemi talem se wanem we kavman i mekem long Saot West Bay, kost blong lokol produs hemi araon VT300,000.

“Kavman hemi enkarejem ol pipol blong fokas plante long prodaktiv sekta mbe plante taem mein isu blong ol fama long rurol komuniti hemi maket blong salem produs blong olgeta,” Mr Tamau i talem.

“So fasen olsem blong kam pem kakae long doa step hemi relief long ol fama.

“Oli bin kam pem ol kakae olsem wota Taro, Fiji Taro, Wild Yam mo ol nara vegetable olsem raon cabij mo capsicum long saot Malekula.

“Program ia i mekem isi laef long ol fama espeseli long ol rimot ples we i nokat gud rod akses blong ko long maket i isi.

“Mo mi wantem talem tankiu long Ministry blong Trade long initiativ ia mo yumi luk fowod blong program ia i kontinu long futja.”

Kavman mo Private sekta i bin ko long Malekula, Ambrym mo Paama blong pem kakae olsem wan triol blong komomoretem Mini Vanuatu Made Trade shoa we e stap wetem Malampa Day selebresen long Lakatoro, Malekula.

Donald Pelam, Advans tim lida long Trade Ministry, i talem se hemi plan polisi blong kavman blong tete blong ko daon long grasrut blong oli kasem seves blong kavman.

Hemi talem se kavman i pem shipping sabsidy blong VT3.5 million from hemi hirem ship blong faev dei.

Mr Pelam i talem se ol fama i glad tumas blong luk kaen program olsem we kavman i visitim olgeta blong pem ol lokol kakae.

“Minista blong Trade, Honoroble James Bule, i wantem se yumi adresem ol isu ia blong mekem laef blong fama i isi blong winim vatu,”Mr Pelam i talem.

“Hemia blong fama i no hadwok blong hemi sendem olgeta prodak blong hem long ship o plane blong kasem maket long Port Vila.

“O even wan fama hemi go staon blong sam haoa long maket mo hemi stap koko samtaem hemi no salem evri prodak blong hem mo hemi tekem i ko bak long hom.”

Mr Pelam i talem se resen ia nao oli ko wetem Private sektor.

“Wan gudfala samting abaot triol ia from mifala i ko daon wetem Vanuatu Basket, Fine Foods Limited, South Sea Shipping wetem Dynamic Suppliers,” Mr Pelam i talem.

“Olgeta kampani ia oli sendem ol ripresentativ blong olgeta i kam daon mo olgeta nao oli pem ol lokol rut crop.

“Kavman hemi lukluk nomo long shipping sabsidy we hemi helpem Ocean Chief- Wan ship we hem nao i ko daon long Malampa blong tekem ol kakae.”

Ship ia i kam daon wetem tri kontena.I kat wan kontena we hemi frozen, wan hemi chil kontena mo nara wan hemi open nomo.

“Frozen kontena hemi olgeta rut crop we hemi kam mo oli pilim vinis,” Mr Pelam i talem.

“Nara wan chil kontena, yumi yusum blong putum olgeta vegetabol.

“Mo open kontena yumi yusum blong putum ol kakae we i nokat taem blong yumi pilim aot skin.”

Long Malekula i kat tu port we ol fama i kam lem, wan long Litzlitz mo nara wan long Lamap. Ambrym i kat tu port mo Paama long Liro port we oli pem ol rut crop long plesia tu.

Mr Pelam i talem se oli bin invaetem Presiden blong Malampa Provins, Aisik Abel, blong kam long Vila blong luk ol kakae ia mo visitim ol kampani we ol produs ia i ko long hem blong oli salem.

“Hemi wan pablik -private patnaship we hemi wan sakses,” Hemi talem.

“Tan blong ol rut crops hemi araon 16 tan we ol baya i pem.”

Mr Tamau i talem se Vanuatu Food Basket nao i pem ol lokol kakae long saot west bay from i kat hae diman long Vila.

Hemi talem se ol fama i glad tumas from eria blong Saot West Malekula, rod i nogud mo i had blong oli tekem produs i kam daon long pasis blong ship.

 

 

 

(Visited 175 times, 29 visits today)

About The Author

You might be interested in