Fes eva billiard kompetisen long Port Vila

Grey Light Billiard Club long Port Vila bae i hostem wan fes eva billard kompetisen long en blong manis January long Simbolo eria.

Finance Ofisa blong Grey Light Billiard Club, Malon Nauka, i talem se kompetisen ia i blong sapotem ol yangfala billard pleia blong Grey Light Billiard Club blong reisem vatu mo helpem olketa blong faenem wok.

Hemi talem se oli wantem involvem plante tu ol pikinini, ol kel mo ol woman blong pat long niu spot discipline ia we i sta kro bigwan long kaontri naoia.

Hemi talem se kompetisen ia i blong helpem bak klab mo kivim bak long komuniti.

“Lukluk i stap se bae mifala i karem araon 150 pleia blong pat long kompetisen ia long namba 30 January mbe namba i save ko antap,” Mr Nauka i talem.

“Mi wantem se taem ol club oli kam plei long kompetisen ia, oli mas involvem moa ol pikinini mo woman,” Mr Nauka i talem.

“Tete yumi tokbaot billard, yumi kat tinktink se ol bigfala man nomo oli save plei mbe sapos eni man we i neva luk ol pikinini i plei, yu kam wajem kompetisen, bae yu no sapraes blong luk wan 15 yia old pikinini i winim wan 30 yia old.

“Taem mi talem se kivim bak long komuniti, hemi minim se bae mifala i setem ap ol tent blong ol mama oli save kam salem kakae long hem long taem ia.

“Ol mama o kel we oli stap nating nomo, plis kam joinem billard, hemi wan spot we yu no sweat mbe yu tinktink nomo long hao yu save sutum bul mo hemi fun.

“Fi blong pat long kompetisen ia hemi VT1000 long wan pleia mo bae i kat ol prize blong ol club we oli win.”

Selonie Iaruel, Captain blong Galaxy Football Club we i Vice Secretary blong Grey Light Billiard Club, i talem se “Football hemi difren long billiard from fulap yangfala i kam tuketa oli sherem ol tinktink mo yumi mekem niu fren,” hemi talem.

“Mi jes kam insaed nomo long club mbe mi faenem wan niufala famili long tim blong billard vinis.

“Kompetisen bae i stap long Simbolo narasaed yad blong leit Father Walter Lini.”

Mr Nauka i apil long ol billard club blong mas involvem plante ol pikinini from oli ol futja blong tumoro.

“Taem mifala i involvem plante ol pikinini, mifala i luk se i kat futja mo hemi katem daon ol tinktink blong ol pikinini blong oli ko folem ol boy we oli smoke marijuana o involv long ol nara rabis aktiviti,” hemi talem.

“Grey Light Billard Club i kat wan tija blong billard we i stap trenem mo cojem ol pikinini stat long age ten kasem 15 evri Monday, Wednesday mo Friday mo class ia i fri nomo, yu no nid blong pem wan fi blong pikinini blong yu i kam plei.

“Ol pikinini ia oli kam long eni eria blong Simbolo nomo mo oli plei kasem 9am mo stop afta ol yangfala mo ol bigman oli kam plei.”

Mr Nauka i talem se i kat fulap eria long kaontri oli introdusum ol billard kem long ol nakamal mbe hemi gud blong mekem good use long hem.

“Plante taem yumi luk ol nara spot discipline i moa popula long billard, mbe wan samting we mi wantem luk se i mas kam wan spot discipline we i semak long football blong ol man i kam blong waj,” hemi talem.

VBTC sport i andastanem se snooker mo billard aweaness i bin tekem ples lo olgeta komuniti raon long Efate long Oktoba 2020 blong letem ol pipol we oli pleim sport disapline ia, se bae i kat wan association i setap.

Tufala sport ia, Snooker mo Billiard, i bin bin rejista anda long bigfala bodi wei lukaotem olgeta spot insaed long kaontri we hemi , Vanuatu Association blong Sports mo National Olympic Committee blong oli save ranem ol kompetisen o tunamen insaed long kaontri.

 

 

 

 

 

(Visited 69 times, 1 visits today)

About The Author

You might be interested in