Fes Napuan Komiti; Sud kat moa diskasen

Fes Napuan Komiti i biliv se Kavman i sud diskas moa wetem olgeta blong kivim sam opsen bifo oli saenem oda blong stopem event ia long wik ia.

Chairlady blong Fes Napuan Komiti, Jennifer Kausei, i talem long VBTC Nius se oli bin komitim olgeta bigwan blong okaenasem event ia long wan volunteri basis mbe i sad blong luk se kavman i no konsalt wetem olgeta.

“Mi bin wish se mifala i bin sitaon wetem kavman blong lukluk long sam opsen long ol deit blong Fes Napuan from mifala i bin stap kontinu blong tokabaot deit,”Ms Kausei i talem.

“Kavman i bin askem mifala blong posponem las wik i kam long tis wik. Mi bin wish nomo se oli bin givim mifala advans notis blong holem off event ia fastaem blong mifala i no mekem tumas preperesen mo enkejem plante patna wetem ol sponsasip.

“Mi pesonali mi filim se mi sori long evri wan mo mi apologies long evri sponsa, patna mo ol stol owna we oli luk fowod long event ia. Mbe hemi aot long hand blong mifala.”

Ms Kausei i talem se oda ia i kam long wan taem we evriwan i stap enjoyem event vinis.

“Mi risivim wan oda i kam long kavman long Thursday aftenun blong infomem mifala abaot Public Act Oda Cap 84 we i talem se mifala i no karem wan permit blong asembolem ol man i kam tugeta,” Mrs Kausei i talem.

“Mo oli askem mifala blong stopem aktiviti mo komiti i disaed se mifala i nomo kat eni nara opsen mbe blong folem oda ia nomo.

Edwin Siba, wan stol owna, i talem se ol oda blong kavman i mas fea oltaem.

“Yumi ol stol owna yumi faenem i had long saed blong ol expens blong yumi from i kamaot long own sweat blong yumi,”Mr Siba i talem.

“Bae yumi akri long disisen blong kavman mbe bae yumi no agri tu long wan saed se olgeta i no luksave situasen blong yumi. Long evri fotnaet oli karem salari mo i no wan problem blong kavman mbe yumi ol smol man we yumi nao yumi votem olgeta, kavman i no luk ples ia.

“Kavman i tink se yumi i stap long semak level nomo mbe yumi i stap traem blong winim smol vatu blong sapotem famili long taem blong COVID ia.”

Wan mo lokol we i no wantem talemaot nem blong hem, i kwestenem from wanem kavman i stopem event blong musik ia mbe ol night club, ol kava bar mo ol nara pablik gathering olsem sport i ko hed nomo.

Minista blong Internal Affairs, Honoroble Alatoi Ismael Kalsakau, i rispon blong talem se oda ia hemi blong sefti blong pipol long taem we Vanuatu i kat tu COVID kes long boda.

Minista Kalsakau i talem se event blong Fes Napuan i tekem tugeta tumas man we oli no kam long Port Vila mo Efate nomo mbe ol aelan tu.

“Yumi mas tinkbaot wanem we Prime Minista(Honoroble Bob Loughman) i talem se tufala COVID kes we i stap long bosa, oli sendem tes blong ko long New Caledonia blong konfem se hemi Delta Variant o no, mo i no kambak yet,”Minista Kalsakau i talem.

” Yumi mas stap kwaet mo yumi mas tekem pablik sefti mo health hemi impoten bitim eni narafala samting.

Minista Kalsakau i talem se absens blong aplikesen blong Fes Napuan i mekem oda ia i kamaot tu blong mekem ol organisa i mas be risponsibol.

“Olgeta blong Fes Napuan oli bin aplae i kam long mi blong blokem rod nomo mbe i no bin kat eni aplikesen blong event i save ko hed so olsem anda long Public Oda, i kat ol fom i stap blong yu mas filim in, pas tru long polis mo kam kasem ministry blong givim otorisesen long yu blong save stap long wan posisen blong holem wan asembly o eni nara miting,” Minista Kalsakau i talem.