Fes wina blong COVID-19 incentive

Pamela Bule hemi fes wina blong COVID-19 Incentive wetem VT30,000.

Ms Bule hemi wina blong dro blong Monday wik ia.

Kavman mo Private sekta i kam ap wetem COVID-19 Incentive long wik ia blong enkarejem pipol blong tekem stik blong COVID-19.

Greg Pechan, Owna blong The Havanah Resort mo persen behaed long tinktink ia, i talem se pipol we i ko blong tekem stik blong COVID- 19 long Convention Center long Port Vila i save ko long dro mo winim mani.

Mr Pechan i talem se taem we ol pipol i tekem stik, oli save putum nem blong olgeta long wan daily dro blong winim wan gudfala praes.

Hemi talem se Ministry blong Health mo ol Business haos i kam ap wetem tinktink ia mo i stat long Monday 9 August kasem 20 August; mo evri dei i kat dro.

Mr Pechan i talem se bikfala tingting i blong enkarejem pipol blong oli ko tekem stik blong COVID-19.

Hemi talem se dro mo anaonsmen blong nem bae hemi hapen long VBTC Paradise FM 98.

Mr Pechan i talem se i kat cash praes mo bae i gat sam nara praes tu we ol bisnis haus mo resort oli ofarem.

Sam lokol we oli no wantem nem blong olgeta i kamaot, i talem se incentiv ia hemi wan gud wan blong helpem pipol i tinktink strong blong tekem vaccine blong COVID mo stap sef.

Oli talem se hemi impoten blong pipol i redi mo kam tekem stik meresin.

Long July ia, seken dose blong Astrazeneca vaccine we hemi 20,000 i kasem kaontri.

Long Monday wik ia, i kat aroan 253 pipol oli ko blong tekem vaccine blong olgeta long Convention center.

Long niufala schedule blong COVID-19 vaccination rolaot long Port Vila, long Monday kasem Thursday hemi taem blong Astrazeneneca mo evri Friday hemi Sinopharm vaccine.

Wik ia Ministry blong Health vaccination tim i stat blong givim aot ol seken dose blong Astrazeneca long ol pipol we oli bin tekem vaccine long fes wik blong June.

Mo oli advaesem pipol blong mas kam tekem.

Ol sponsor blong COVID-19 incentive ia hemi Vanuatu Broadcasting & Television Corporation wetem ol bisnis haos, The Havanah Vanuatu, Hurley Lawyers Barristers & Solicitors, Grand Hotel and Casino, VHRA, Recyclecorp Vanuatu, first national Real Estate, Calorite Graphics mo TITA NFX.