Fesbuk i mas yus long stret fasen

Kavman i wonem pipol blong yusum social media long stret wei folem loa blong cybercrime.

Deputy Chief Information Officer long Ofis blong Government Chief Information Officer, John Jack, i talem se loa ia i stap proses blong gazette.

Hemi talem se woning ia i ko espeseli long ol pipol we oli stap yusum fake ID long fesbuk mo tok nogud long nara man o sherem ol pikja we i no blong sherem.

“Bae i kat wan bigfala awenes i hapen raon long Vanuatu afta we loa ia i gazette,” Mr Jack i talem.

“Hemia blong pipol i andastanem gud loa blong cybercrime from sapos yumi no keaful bae yumi nao ol citizen blong Vanuatu we bae fesem loa ia bakeken.

“Bae i kat ol penalti blong hem taem hemi gazette.”

Long Fes Ordinary session blong Palemen long eli yia ia, ol Memba blong Palemen i jes pasem tu loa we i gat penal code mo cyber crime loa we bambae i help blong adresem fasen blong toktok nogud long narafala man long sosel media.

Minista blong Internal Affairs mo semtaem Deputy Prime Minista, Honoroble Ismael Kalsakau, i talem se oli mekem mekem sam jenis long penal code blong dil moa wetem ol kaen fasen ia long social media.

Hemi talem se loa blong cybercrime bae i gazette long tu wik taem.

“Ol man oli tink se oli jampion taem oli yusum fake blong spoilem nara man long fesbuk,” Mr Kalsakau i talem.’

“Yu mas kat courage blong putum stret nem blong long fesbuk mo yusum blong komen.”

Lida blong Oppossition, Honoroble Ralph Regenvanu, i enkarejem pipol blong folem ol stret nius oltaem.

Hemi talem se wanem hemi luk long social media hemi no ol tru infomesen abaot opposition.

“Wanem mi luk fesbuk, oli talem se opposition i kat tri camp mbe i kat wan camp nomo we ol Memba blong Palemen long kavman saed i bin muv i kam long opposition,” Mr Regenvanu i talem.

“Mi stap slip gud nomo long aos blong me wetem ol nara MP blong opposition.”

Mr Regenvanu i talem se ol infomesen abaot kavman i fom tu i kamaot long social media we i no tru.

Hemi talem se ol stret infomesen i kamaot nomo long fesbuk pej blong Vanuatu Opposition Forum.

Ofis blong Government Chief Information Officer we i bihaen long cyber crime loa i aksem pipol blong no abusum social media we hemi wan technology blong komunikeit.

Ofis blong Government Chief Information Officer wetem ol patna blong hem bae oli mekem awenes blong loa ia.