FIFA netwok code crak

Ol hacker we i save gud ol netwok system i crakem code we FIFA hemi givim long ol broadcaster blong FIFA Wol Kap.

Vanuatu Broadcasting mo Television Corporation hemi wan long ol victim blong fasin ia tugeta wetem plante Broadcasta blong FIFA Wol Kap long pasifik.

Fasin ia hemi mekem se FIFA i stopem ol satelite brodcast we hemi afektem signal blong Wol kap we VBTC hemi experiensem naoia.

Sins long Sunday, VBTC tru long Fiji Broadcasting Corporation mo Pasifika TV i yusum wan nara rod blong sendem signal i ko long ol kaontri long pasifik kasem taem FIFA hemi provaedem ol niufala kad blong aksesem gudfala signal bagegen.

Acting Chief Executive Ofisa blong VBTC, Stevenson Liu hemi advaesem ol viua se ol broadcasta i wok wetem FIFA mo Lisensor blong FIFA Wol Kap long Pasifik blong tekem ol kad bifo en blong wik ia blong save gat akses long gudfala signal bagegen long Television.

Mr Liu i talem se VBTC hemi provaedem Free to Air TV we i no semak olsem ol provaeda olsem Digicel we oli gat raet nomo blong givim signal we pipol i pem tru long internet.