Fish poison i kam wan konsen long Erakor

Dispensary blong Erakor long Efate i rikodem ova tri sik man from fish poison long wan dei stat long october yia ia.

Nurse injaj long dispensary ia, Berry Emil, i talem se sik ia i hapen folem amaon blong toti long lagun blong Erakor.

Hemi talem se long evri wik, dispensary i bisi blong helpem ol sik man wetem fish poison mo hemi biliv se ol nara klinic tu kolosap oli stap luk ol man wetem sik ia.

“Fulap long olketa sik man ia wetem fish poison, sik blong olketa i bigwan lelbet mo mi mas hangem botel long olketa,” hemi talem.

“Mo afta mi givim ol medisin blong katem daon efek blong poison nomo insaed long bodi blong olketa.

“Mo samfala we oli sik tumas, mi tritim olketa blong tu kasem tri dei olsem.

“ Yia ia, fulap pipol oli kasem sik blong fish poison folem isu blong polusen long lagun.”

Nurse Emil i talem se pipol i sik tu taem oli kakae shell mo crab long lagun ia.

“Naoia wetem isu blong COVID-19, bae laef hemi mo had mo pipol i mas mekem sua se oli kakae helti kakae blong no kasem sik,” hemi talem.

“Longtaem i kam pipol blong Erakor oli tekem fresh mit long solwota mo naoia hemi no sef nomo blong oli stap kakae.

“Erakor Vilij hemi kat ol pipol blong nara aelan tu oli liv long hem mo hemi gud blong ol otoriti i adresem isu we i stap naoia.

“Longtaem i kam pipol blong Erakor oli tekem fresh mit long solwota mo naoia hemi no sef nomo blong oli stap kakae.

Wan lokol, Enock Yatiknu, hemi bin kasem fish poison tri taem nao folem fish we hemi bin kakae long lagun ia.

VBTC i witnesem we nurse Emil i bin hangem botel long hem from hemi no arem gud.

Mr Yatiknu i talem se hemi harem bodi blong hem i wik tumas.

“Mi arem hed i raon, mi wantem trout, mi sikras, mo mi wik bitim ol narafala sik, “ hemi talem.

“Mifala i wantem se Kavman i mas lukluk long isu blong polusen ia from plante pipol oli no wok mo oli yusum kakae blong karen mo solwota plante .

“Mi bin kakae wan gudfala fish nomo mbe mi sek se mi sik long hem.

“Tete plante pipol oli fesem had taem long sik ia.”

Deputy Director blong Fisheries dipatmen, Sompert Gereva we i lukaotem ol coastal eria, i talem se oli oli bin advaesem ol pipol stat long Emten kasem Erakor aelan se solwota ia i no sef blong oli kakae long hem.

Hemi talem se doti long eria ia i afektem bigwan ol marine risos.

“Taem i kat  fulap doti i ko daon long wan ples we i klos mo i kat wan entri mo wan rod nomo we i ko outsaed, bae everi fish oli afek mo i no sef blong kakae,” Mr Gereva i talem.

“Sik blong fish poison i bin stap ko hed long eria blong Erakor blong longtaem nao.

“Taem wan isu olsem i kerap, hemi wan mata blong prioriti blong mekem se pipol i kasem stret infomesen blong mekem ol raet disisen.”

Mr Gereva i talem se hemi taem ol otoriti i akt blong fixim ol doti we i stap ko daon long lagun ia.

“Yumi save vinis se long Vanuatu taem yumi respon long wan natural disasta hemi tekem taem, mbe hemi gud blong luksave isu blong Erakor lagun,” hemi talem.

“Tete wetem COVID-19 pandemic, pipol oli mas mekem raet choice long laef from yumi talem se no kakae fish from bae oli kontinu blong stap sik.

“Hemi wan serious mata mo pipol i mas kasem raet infomesen blong stop kakae fish long eria ia mo pem fish long market o o long sto.”

Mr Geneva i talem se isu ia hemi no healti mo hemi taem blong ol atoriti i mas tekem wan aksen naoia.

Nurse Emil i talem se plante pipol we oli kasem fish poison, yia blong olketa i stat long 20 kasem 60 yia olsem.

 

(Visited 414 times, 1 visits today)

About The Author

You might be interested in