Fish poison -March

Ol pipol oli mas lukaot long fish poisoning long manis March folem jens long temperature blong solwota long wik ia.

Woning ia i kamaot long Weta Ofis.

“Temperaja i save hae kasem wan difrens blong 30centimeter; so yumi we yumi liv olbaot long ol eria kolosap long solwota yumi stap alert nomo from temperature especially long ol aelan long Not yumi expek blong solwota i save kasem wan difrens blong 30centimeter; sam aelan bae coral i ded from temperature blong solwota i hot,” Principal Scientific Ofisa long Vanuatu Meteorology mo Geo-Hazards, Glenda Pakoa i talem.

“Yumi daon long Central mo Saot i no tumas. ”

Research mo Developmen Ofisa blong Meteo ofis, John Ruben i explenem se hae tempreja ya i save spoilem rif.

“Yumi save se taem yumi stap expektem wan bigfala inkris long temperature blong solwota bae i kat ol impak olsem ol coral i lusum ol kala blong olgeta mo taem coral i lusum kala, sam rif fish bae i save kam poison,”

“So taem yu ko stap pem fish blong kakae, jekem gud ol rif fish.”

Director blong Fisheries, Sompert Gereva i advaesem pipol blong keaful.

“Fish poison o Ciguatera i nogat eni test blong hem mbe hemi taem yu kakae nomo yu save arem difrens; Fish poisoning mifala i lokeitem long Torres kasem long Aneityum, evri aelan i kat ol fish we oli save poisonem ol man mo i dipen sam aelan i kat moa species blong fish we i save poisonem man mo sam i kat smol nomo. So askem ol komuniti long wea ples oli kasem ol fish long hem mo weta hemi gud blong kakae long warm season we yumi stap long hem tete,” Mr Gereva i talem.

Mr Gereva i wonem ol pipol blong no salem rif fish we i save mekem man i sik.

By Tiffany Baldwin.