Flag blong Vanuatu i flai long Vet Tagde aelan

Nasonal Flag blong Vanuatu i flae blong festaem long wan smol rimot aelan blong Torba Province, Vet Tagde.

Minister blong Finance mo Economic Management, Johnny Konapo i talem se Vanuatu bae i stap selebretem 40 yia Independence blong hem long yia ia, mo hemi taem nao, ol pipol i sitdaon mo lukluk i ko bak long taem blong ol struggle blong Independence.

Hemi talem se,” Taem Vanuatu i glad blong selebratem 40 yia, ol pipol i mas tinkbaot ol smol aelan olsem hemia blong i kam impoten long taem blong storian mo wokbaot long baondri blong kaontri.”

“Wan long ol samting ia nao hemi baondri o eria blong exercisem administrative pawa blong Vanuatu long hem blong soem se hemi wan soverent nesen,” Minister Koanapo i talem.

“Wan simpol exampol hemi wan jif, everi jif oli kat ol baondri blong olketa blong oli exercisem pawa blong olketa, blong yumi afta 40 yia yumi manej blong finalisem baondri blong yumi long Not we tedei umi kam bak blong soem long wol se yes hemia mak blong yumi mo yumi bin save achivim wokbaot ia nomo from yumi long Not kasem South yumi save wok tugeta.”

Minister Koanapo i talem se i kat plante samting we Vanuatu i kasem, be ol pipol i no mas fogetem se Independence hemi save minim plante samting.

Hemi talem se long 2016, Vanuatu i saenem wan treaty blong klosem baondri wei kaontri i save selebratem afta 40 yia blong Independence, hemi soem se afta 40 yia yumi jes kam blong joinem haf pat blong Vanuatu, mbe nara haf bae olsem wanem, bae tekem nara 40 yia bakeken?

“Mi askem everi wan blong mas wok tuketa blong makem ol baondri blong Vanuatu we i stap yet,” Minister Koanapo i talem.

“Hemi wan wei blong kam tugeta blong putum wan vois blong klosem nara haf blong kaontri blong Vanuatu we i stap long Saot.

“Taem tete tu hemi wan historical momen from hemi fes taem wei wan state Minister i kam long aelan ia Vet Tagde, we nokat man i liv long hem.”

Hed blong Anglican jej long diocese blong Banks mo Torres, Bishop Patterson Worek i dedicatem national flag blong Vanuatu tru long wan shot jej seves long smol aelan blong Vet Tagde.

Mo wan sitisen blong Torba provins we hemi wan Police Officer nem i bin pulum fes flag long aelan ia.

Long en blong seremoni, Minister Koanapo i planem wan coconut blong soem se Kavman i bin kasem aelan ia mo naoia Vet Tagde i pat blong Vanuatu.

Historical trip ia hemi olsem wan reflection blong flag raising long Hunter aelan long 1983, taem leit Prime Minister Father Walter Lini, i bin sendem ol man blong hem blong ko daon long Hunter aelan long Euphrosyne II, mo putum wan plak mo putum flag long hem blong soem long Wol se tufala aelan long saot hemi blong Vanuatu.

(Visited 54 times, 1 visits today)

About The Author

You might be interested in