Fo aktiv COVID -19 kes

Vanuatu i konfemem fo aktiv COVID-19 kes long boda.

Prime Minista, Honoroble Bob Loughman i mekem anaonsmen ia long tete(Thursday) evening.

“Ol fo COVID -19 kes ia, wan i kam long repatriation flaet blong Brisbane, Australia mo nara tri long flaet blong New Caledonia,” Prime Minista Loughman i talem.

“Bambae Ministry blong Health i sendem ol sampol blong test blong olgeta aktiv kes ia i ko ovasi blong faenem wanem type blong COVID-19 ia. I kat ten pasenja we oli kam long flaet blong Brisbane mo  New Caledonia we oli stap anda long investikesen we Ministry blong Health i stap karemaot naoia tru long ol tes.

“I nokat eni evidens yet blong konfemem se i kat komuniti transmisen. Diteksen blong olgeta kes ia hemi folem strik COVID-19 mesa mo protocol we Ministry blong Health hemi stap implementem wetem olgeta agensi.

“Mi wantem konfemem tu se olgeta pasenja we oli kam long olgeta flaet ia oli bin mitim mo folem evri health entry rikwamen blong travel i kam insaed long kaontri blong yumi. Evri frantlin wokman tu oli stap long hae risk blong expos long taem blong tufala flaet we i bin ko stret long kwarentin. ol frantlin wokman ia tu oli folem evri rikwamen mo strik protocol blong COVID-19 long taem blong prosesem ol flaet.

“Mi stap askem blong evri man, woman mo pikinini we oli stap naoia long kwarentin blong folem ol strik protocol mo olgeta health mesa olsem washem han wetem sop mo wota, no tajem ae, nose mo maot. Pratisim ol gudfala hygience mesa, oltaem mas klinim gud ol antap blong table mo jea, yusum mask taem yu kasem instraksen mo no stap kolosap long nara man o woman.

“Kasem taem we Ministry blong Health i kambak blong talemaot ol risal blong investikesen, mi stap apil long pablik blong limitim ol sosiol gataring long pablik ples mo ol kava bar.

“Mi stap wantem talemaot tu se bambae i kat temporari saspensen blong international inbound pasenja flaet kasem taem we evri investikesen mo kondak tracing i hapen.”

Prime Minista Loughman i talem se folem ol fo aktiv COVID kes ia, Efate mo ol offshoa aelan blong hem oli muv naoia i ko long alert level 1.

“Long alert level 1, yumi enkarejem pablik blong kontinu blong folem ol health mesa blong washem han wetem sop, no tajem ae, nose mo mouth, werem mask mo.

“Ol nara pat blong Vanuatu i stap yet long alert level zero. Kavman i askem olgeta we i no tekem COVID Stik meresin yet blong kam fowod mo tekem stik blong stap sef.”

Vanuatu i rikodem six repatriation flaet we oli stat long February 12. Long Satete February 12, tri flaet i kam long kaontri, Wan jata flaet long Auckland, New Zealand we i tekem eight pasenja, wan Air Vanuatu flaet we i tekem 86 pasenja mo wan flaet long New Caledonia we i tekem tu pasenja.

Long Sunday February 13, wan jata flaet i tekem 100 Ni-Vanuatu Seasonal Wokman we oli pat long Recognised Seasonal Employer Scheme long Christchurch, New Zealand. Long Tuesday February 15, Wan Air Vanuatu flaet long Brisbane, Australia we i tekem 81 pasenja. Mo long Wednesday February 16, wan flaet long Noumea, New Caledonia we i tekem 24 pasenja.

Prime Minista Loughman i talem se kavman i alaoem ol repatriation flaet from ol citizen we oli wantem kambak, ol wokman we bae oli wok long ol kavman projek mo ol foreign ofisiol.

 

 

(Visited 525 times, 1 visits today)

About The Author

You might be interested in