Fo kavman MP i joinem opposition

Fo Memba blong Palemen long Kavman saed i joinem Opposition blong soem interes blong ol vota blong olgeta.

Olgeta memba ia hemi John Still Tariqwetu wan Memba blong Palemen blong Ambae, Jack Norris Kalmet, foma Minista blong Lands Mo Natural Resource mo wan Memba blong Palemen blong Efate Rural, Wan Memba blong Palemen blong Santo Rural, Fabiano Stevens mo Foma Spika blong Palemen mo wan Memba blong Palemen blong Malekula, Gracia Shadrack oli muv i ko long opposition saed long Mandei.

Jack Norris Kalmet, wan Memba blong Palemen blong Efate Rurol, i talem long VBTC Nius se oli disaed blong muv from national intres.

Hem i talem se ol nara 19 MP oli afek long isu blong vacancy seat act.

“Status blong mifala i difren long olgeta so mifala i muv from national intres,” Mr Kalmet i talem.

Lida blong Opposition, Honoroble Ralph Regenvanu, i talem se ol fo memba ia oli mekem raet disisen.

Opposition i welkamem olgeta long wan press konfrens long Mandei wik ia.

Long wik ia, Prime Minista, Bob Loughman i apointem Memba blong Palemen blong Tafea Outer aelan, Edward Nalyal olsem niu Minista blong Lands mo Natural Resource.

Public Relation Ofisa blong Kavman, Fred Vurobaravu, i talem se i kat alekesen se foma minista, Mr Kalmet, i stap atendem ol miting blong Opposition mbe i no infomem kavman.

Mr Regenvanu i talem se ol memba ia i muv folem disisen blong Supreme Court long Friday 18 June we i  diklarem se jea blong naentin Memba blong Palemen includim Praem Minista, Bob Loughman mo Deputy Prime Minista, Ismael Kalsakau i empti.

Long Friday aftanun, Supreme court i sakemaot aplikesen blong olgeta blong jalensem disisen blong foma Spika blong Palemen, Gracia Shadrack.

Supreme Kot Jaj, Oliver Saksak, i agri se supreme court i save givim tingting blong hem long vacancy blong ol seat blong palemen mbe hemi mas folem wanem loa i talem.

Justice Saksak, i talem se i agri se Mr Shadrack i mekem wan stret anaonsmen long namba 8 June abaot olgeta 19 MP ia we oli no atendem tri Palemen sitting.

Hemi talem se Mr Shadrack i no nidim wan legal proceeding blong pruvum disisen we hemi mekem.

Hemi talem tu se i no brekem eni raet blong ol memba.

Justice Saksak hemi talem se i bin gat wan kes olsem finis we hemi hapen long Vanuatu.

Justice Saksak i extendem stay oda we i stap kasem apil hearing i tekem ples.

Prime Minista Loughman, i kamaot live long televisen afta long court kes risal ia blong askem pipol i stap quiet mo letem kot i mekem finol disisen.

“Mi askem evri pipol stat long not kasem saot blong stap kwaet from faet long court i no stat yet,” Prime Minista Loughman i talem.

“Kavman bae i yusum evri avenu long loa blong apil.”

Prime Minista Loughman i talem se pipol long kaontri i sud hapi mo kontinu blong wok.

Kavman i faelem wan sivil kes i ko long kot long eli wik ia.

Mr  Vurobaravu i talem se aplikesen ia hemi blong kot i rul weta o nokat 19 MP oli atendem tri konsekutiv siting blong Palemen.

Mr Regenvanu i talem se oli stap wet nomo blong court i diklarem seat blong ol 19 Memba ia.

Hemi kol long ol nara MP we oli no afek long isiu ia  blong tinkbaot national intres mo joinem opposition.

(Visited 1911 times, 1 visits today)

About The Author

You might be interested in