Fo provins i mas praktisim COVID rul

Torba, Penama, Malampa mo Tafea i mas ko hed blong pratisim ol health COVID rul.

Director General blong Ministry blong Health, Russel Tamata, i talem se denja blong COVID i stap yet from ol seves blong ship mo plen i ko hed long ol aelan.

Mr Tamata i talem se ol provins ia oli nosave ko long alert zero yet.

“Komuniti transmission i kam long Vanuatu finis, resen blong hem, hemi pipol oli mas tingting blong yusum ol simpol samting blong pripea, taem ristriksen hemi stil stap,” Mr Tamata i talem.

“Yu luk wanem i hapen long Vila, taem yumi no practisim ol rul, i hard wok long mifala long helt, even blong askem pipol blong werem mask ia. So hemi wan gud samting, taem yu stap long level 1, skul i gohed, be ol simpol proses we i stap long level 1 ia, yu stap praktisim.”

Mr Tamata i talem toktok ia blong rispon long ol konsen we ol pipol long fo provins ia oli reisem se oli stap long level 1 be i nogat eni kes.

Long Vanuatu outbreak alert system, alert level 1 hemi medium we i minim se i gat kes oli bin faenem long kwarentin fasiliti be i nokat transmisen aotsaed.

Mo alert level zero we hemi low i minim se i nokat kes mo low risk long komuniti.