Foti yia Independens Annivesari wan sakses

Foti yia Independens selebresen we i bin hapen truaot long kaontri hem i bin wan sakses.

National Coordinator blong event, Fred Samuel, i talem se taem ia pipol i bin soem nasonal bride, unity mo hem i bin wan wik we plante pipol i dresap kalaful wetem ol klos we i soem nasonal kala blong Vanuatu.

Comemoration ia hemi pruvum se pipol oli gat ful pride from kaontri.

National coordinator Samuel, i talem se aotkam blong event hemi folem komitment blong everi singol citizen we oli bin patisipet long prokram.

“Mifala everiwan long committee i glad mo i praod se tenaraon blong event hem i veri saksesful. Everi aktifiti we yu bin atendem hem i gat big crowd we oli kam tugeta long hem,” Mr Samuel i talem.

“Infact mi wantem aprisiatem presens, patisipesen mo sapot blong everiwan includum olgeta we oli stap ovasi.

“Fes and fomos yumi talem tankiu long everi citizen blong Vanuatu we ating everi toktok, planning, tingting mo advaes we yumi bin kivim long olgeta, everiwan oli respon veri positifly.”

Mr Samuel i talem se long ol provins, fiva blong selebresen hemi bin semak olsem long capitol Port Vila.

Comemoresen blong 40 yia Independence Anniversari ia hemi bin tajem plante man.

Plante long olgeta we oli bin invlove long strakol blong Independence oli laef yet mo gat janis blong comemoratem 40 yia blong Independens.

I bin gat sam activiti we i pulum bak sam histri olsem tamtam mo pupu shell we oli bin usum long 1980 we i still stap yet kasem tede.

Mr Samuel i talem se ol activiti olsem trade mo tourism sho, agriculture sho, kastom mo kalja displei hemi bin educatem ol pikinini mo ol yangfala plante.

Nasonal Komiti i talem se ol prokram i bin ko aot gud mo i no bin gat tumas komplen.

Mr Samuel i talem se fidbak blong selebresen blong yia ia bae hemi priperem Vanuatu blong selebretem Golden Jubilee blong hem long nekis ten yia

Foti yia selebresen bae hemi kontinu blong stap olsem wan stori long ol pikinini blong tede.

(Visited 18 times, 1 visits today)

About The Author

You might be interested in