Fotin Santo polis ofisa i saspen

Vanuatu Akting Polis Seves Komisina hem i saspendem 14 Vanuatu Polis Fos Ofisa long Santo, folem complen blong polis miscondak las wik.

Akting Polis Seves Komisina, Colonel Robson Iavro, hem i talem se hem i bin saspendem ol ofisa ia long Mandei.

“Long wan fes inkwaeri [long alekesen blong polis vaelens], mi bin saspendem 14 memba blong Vanuatu Polis Fos long Santo blong alawem wan ful investikesen long condak blong ol polis ofisa ia long Big Bay long Santo,” Colonel Iavro i talem.

“[Bae i gat tu] prosecution blong eni ofisa we oli bin faenem se hem i liable from ol [illegal] aksen.

“Ol ofisa ia oli saspen pending aotkam blong polis investigation. Yumi hop se investigation bae i no tekem long taem mo yumi askem ol suspended ofisa blong coperet wetem ol investiketa.

“Sapos infomesen i ko kwik long ol investiketa, bae yumi save dil kwik wetem kes.”

Akting Polis Seves Komisina i talem sori tumas long ol pipol long Big Bay Bush we oli bin kasem kil o oli bin gat damej long propeti blong olgeta, long wan insiden long 19 June taem ol polis oli talem se oli bin atentem lokesen folem ripot blong distebens.

Hem i assurum ol pipol blong Mataloi Community long Big Bay Bush se jastis bae hem serve long komuniti blong olgeta.

Ol polis investiketa bae oli ko bak long Santo long ol dei we i stap kam blong kontinu wetem investigation blong allege polis brutality mo misconduct.

Colonel Iavro hem i askem pablik blong sapotem mo asistim ol polis ofisa we oli stap karemaot investikesen.

Hem i stap apil long sosol media blong pablik i mas soem rispek long ol polis folem wanem we hem i talem se sam pipol oli stap “swe long ol polis ofisa long sosol media.”

Hem i talem se pablik i mas alawem ol polis blong mekem wok blong olgeta blong dil wetem kes blong Big Bay Bush ia.

“Polis bae oli mekem apropriate inkwaeri mo bae oli investiketem ol post long sosol media mo dil wetem eni man o pesen we hem i swea long polis man mo woman long sosol media,” hem i talem.

“Hem i veri shemful mo veri sad blong luk ol citizen oli swea long ol polis ofisa mo ol famli.

“Mi stap apil long ol citizen blong Vanuatu blong kontinu blong sapotem ol polis blong karemaot ol duti blong olgeta.”

Mr Iavro i talem se insiden long Big Bay Bush long 19 June we sam memba blong pablik oli bin mekem allegation se ol polis ofisa ia oli bin asoltem olgeta mo haus oli bin bon, hem i wan sad wan.

“Yumi regret se insiden hem i bin happen mo bae mifala i dil wetem folem loa. Olgeta we oli bin patisipet long insiden, bae oli fesem ful fos blong loa.”

Akting Komisina Iavro i talem se long Fraedei 19 June, ol polis ofisa ia i bin respon long ripot blong wan distepens long Big Bay Bush olsem we oli bin stap mekem long ol okesen bifo.

Hem i talem se long okesen ia, i lukim se ol polis oli kam involf long distebens we i stap tekem ples.

Hem i talem se distebens long Big Bay Bush we ol polis ofisa oli stap respon long hem, hem i bin kos long wan rao we i brokaot bitwin ol famli from kava. Hem i talem se wan long-standing land dispute isiu hem i bin wan triga tu blong komuniti distebens ia.

Atlis 16 man we oli bin suspektem olgeta se oli bin involf long original distebens long Big Bay Bush, Santo Magistrate Court hem i bin rimandem olgeta mo oli wet from Preliminary Inquiry blong kes ia we bae i tekem ples long 9 July.

(Visited 3515 times, 4 visits today)

You might be interested in