Fuel shotej long Vanualava

I kat fuel shotej long Torba Provincial Hedkota, Sola long Vanualava blong tu wik nao.

Charles Lamlam, lokol fama blong Valua vilij long aelan blong Motalava we i kat wan banana bot, i talem long VBTC Nius se ol trak mo baot owna oli wari bigwan naoia from sapos fuel stock i no kam yet long Sola bae oli nomo sevesem ol pipol.

Mr Lamlam i talem se fuel nao i tekem ol fama blong ol nara aelan long Banks grup long ol banana bot i ko long aelan blong Vanualava.

“Mifala ol pipol blong Ureparapara, Motalava, Mota mo Vanualava we oli kat trak mo bot oli faenem had naoia blong pem fuel,” Mr Lamlam i talem.

“From Fuel station long sola naoia tu wik nao i nokat benzine mo fuel.

“Mifala i mas ko long Gaua blong pem fuel long aelan ia.”

Mr Lamlam i talem se sapos fuel i no kam long wik ia o long nekis wik, bae trak mo bot i nomo sevesem pipol.

Hemi talem se trak mo bot tufala i ol impoten mins blong transpot long Torba Provins.

“Ship nao i stap transpotem fuel i kam long Sola mbe i kat sam smol ship i bin pas olsem Ambrym Star mo tu moa mbe oli no bin tekem eni fuel i kam,”Mr Lamlam i talem.

“Ol ofisa blong fuel station long plesia i talem se fuel bae i kambak long las wik ale taem mifala i kam long Vanualava tete blong pem fuel oli se neks wik bae i kam. Yumi nomo save se wetaem stret bae i kam.

Mr Lamlam i talem se wetem isu blong fuel, oli askem ol otoriti blong oli save setem ap wan fuel station long Motalava nomo.

Hemi talem se i kat fuel station long Gaua mo Vanualava nomo mbe ol aelan blong Torba i no kolosap long olgeta.

Wan sos long Pacific Petroleum i talem se fuel bae i kasem sola long nekis wik long ship kiwi trader we naoia i stap ko long santo.

Hemi talem se resen from wanem fuel stok i dilei from oda blong fuel long sola i bin ko leit long Santo long las fridei nomo.

(Visited 187 times, 1 visits today)

About The Author

You might be interested in