Gambling problem

Gambling long ol woman i stap long rise long Efate taem i luk oli plei kad from vatu.

Betty Noel long Tanoliu vilij i talem long VBTC Nius se gambling i helpem olgeta blong winim vatu.

Mrs Noel i talem se long eli January ia from COVID mo plante oli lusum wok.

Mrs Noel i talem se ol mama i luk se bingo nomo hemi sapotem olgeta long nid blong pem kakae mo sop.

“Hemi onli wei we mifala i tekem mani aot long hem; So festaem mifala i ple long VT50 be naoia mifala i plei long VT20 we hemi help tu from sapos yu win yu save tekem VT2000 o VT3000 olsem,” Mrs Noel i talem.

Nating se fasin ia i helpem ol mama ia, plante pipol i gat narafala luluk long aktiviti ia.”

Long Emua vilij, wan papa, Robea Obed hemi talem se plei kad evri dei hemi nogud.

“Mifala long Emua i kat wan grup we olgeta tu i stap plei kad, mifala i faenem aot se samtaem ol pikinini blong aftanun kindy oli no stap ko long skul from ol mama i spendem taem tumas long kad,” Mr Obed i talem.

“Nara samting hemi samtaem papa nomo i hadwok long aos. Mama i sitaon long kad mo sam komitmen long haos olgeta tu i nosave mekem from oli stap plei kad koko i ko tudak.”

Komuniti lida blong Paunangisu vilij, Kalmaire Kalmar i talem se ol mama long Not Efate oli no mas mekem exkius blong lukaotem mani blong fidim famli.

“Graon i stap mo oli no kat wan excuse blong dipen long mani blong gambling blong mekem inkam,” Mr Kalmar i talem.

Klak blong Presbyterian Jioj, Pastor Collin Keleb i diskarejem ol woman blong no dipen long mani blong kad.

“Bible i talem se best komitmen nao hemi blong sweat. Laef blong gambling i stap bifo COVID vinis,” Mr Keleb i talem.

Hemi talem se i kat ol negativ saed we i afektem famili.

“Blong plei kad blong winim mani ol mama nao i kam moa insaed long hem, so sapos hemia nao rod blong olgeta we birthem futja komuniti hemia i wan gud investmen?

“Even long environmen long taem ia bae i mas kat agruemen o filing we i nogud from wan i win mo ol nara wan i lus mo bae i lid ap long wan nara samting.

Woman candidate long Efate rural, Gloria Julia King i enkarejem ol mama long vilij blong yusum gud taem blong olgeta blong faenem wei blong mekem mani.

Hemi talem laswan se ol woman oli natural maneja long hom finis mo hemi enkarejem olgeta blong ko long agrikalja farm.

by trainee journalist, Agnes Herbert & Tiffany Baldwin.

 

(Visited 397 times, 1 visits today)

About The Author

You might be interested in