Givhan long nara man long nid

Wan lida i talem se hemi taem blong givhan long nara man long taem olsem.

Memba blong Palemen, Honoroble Jotham Napat i apil blong pipol i serem kakae long wan man long taem naoia.

Mr Napat i pem kakae long Eton Cooperative mo tekem manioc long garen blong hem blong kivim long sam pipol long Port Vila

Hemi askem pipol blong askem help sapos oli kat enaf.

“Mi wantem karemaot hat blong mi olsem wan memba blong Palemen, mi wantem blong putum hat olsem wan Ni-Vanuatu,” Mr Napat i talem.

“Nating to do wetem politik. Yumi evriwan ia yumi stap long wan crisis(trabol taem) mo sapos eni Ni-Vanuatu hemi stap aotsaed longwe we hemi stap harem mi, mo hemi kat enaf long hom blong hem, mi tink se hem tu i sud mekem semak.

“Mi stat smol mbe hemi blong helpem ol famili we oli stap stragol. Bae mi mekem wan apil long tumoro(Thursday) long fesbuk blong pipol we oli nidim kakae i talem. Mi kat plante manioc we mi ko stap digim mo putum wetem ol basket kakae ia.”

Mr Napat i talem se givim wanem we yu kat blong save sapotem wan nara famili.

“Yumi ol man Vanuatu, hemi wan fasen we ol pupu blong yumi oli tijim yumi blong sherem wanem we yumi kat,” Mr Napat i talem.

“So mi bae long tumoro mo afta tumoro( Friday) ating bae mi serem kakae bakegen. I no naf from hemi smol mbe hemi wanem mi biliv se sapos mi save helpem wan famili blong liv wan nara dei hemi wan samting we mi apresiatem.”

Sam pipol long Port Vila we oli no wantem talem aot nem blong olgeta i talem se hemi ova 2 wik nao we help i no kasem olgeta. Oli talem se sam oli fesem had taem blong pem rent from sam oli lusum wok.

Mr Napat i helpem sam pipol long eria blong Beverleyhills, Blacksands mo Erakor.

Hemi ko pem bag rice putum wetem sam kokonat mo aelan cabij.

 

 

 

(Visited 608 times, 1 visits today)

About The Author

You might be interested in