Hae janis se kokonat bitel i spread

I gat hae janis se Coconut Rhinoceros Beetle i spread aot long Efate.

Armstrong Sam long Dipatmen blong Biosecurity i talem se wan tim bae i ko long Santo blong kontaktem wan seveilens wok folem ol unconfirmripot se i kat kokonat bitel ia.

Mr Sam i talem se oli no kasem konfem ripot yet be hemi admitim se taem i kat COVID outbrek, wok blong kontrolem beetle ia long Efate i ko daon.

“Hemia bae i save konfemem tru long surveilens ripot we bae ol ofisa blong yumi i ko daon long wik ia blong kondaktem,” Mr Sam i talem.

“Taem oli kondaktem mo mekem wan finding, plesia nao bambae yumi save konfemem. Be yes yumi bin stap manajem domestik port blong yumi bifo i kat komuniti transmisen. Ples ia nao i mekem ol ship i step in, mo oli ko anchor outsaed blong 48 haoa we hemi no alaoem mifala blong bodem mo jekem ship. Mo afta long 48 haoa oli aot.

“Ship taem hemi stop aotsaed i kat hae posibiliti from laet i on mo atraktem bitel i flae i ko. Hemia i mekem se ol bitel ia i save stap long ship mo ko long aelan.”

Kokonat bitel ia oli bin faenem feswan long Mangaliliu vilij long Efate long May 2019.

Bitel ia hemi wan pest blong kokonat mo ol palm tri.

Bitel ia hemi native long west blong Europe mo Scandinavia be i spread long Africa, Asia mo ol aelan long Pacific.

Jerryson Hosea, Eria administrata blong Notwest Malekula i talem long VBTC Nius se oli mekem vatu long kokonat mo sapos bitel ia i kasem eria blong olgeta bae oli safa.

Biosecurity Dipatmen i bin wok wetem ol lokol blong klinim mo distroem ol breeding site blong bitel ia long Mangaliliu eria.

Oli bin aplaem ol biocontrol agent we hemi ol virus we i inject i ko long man bitel mo hemi rilis i ko long ol kokonat plant.

Biosecurity i talem se stadi i soem se kontrol ia i efektiv long ol nara pacifik kaontri olsem Fiji, Papua New Guinea mo Samoa.

Ol aelan long Not blong Vanuatu oli mekem mani long kokonat olsem copra blong winim vatu mo pem skul fi blong ol pikinini.

 

 

 

 

(Visited 291 times, 1 visits today)

About The Author

You might be interested in