Harold damej helt fasiliti ribuilding blong stat long nekis manis

Ministry blong Health i talem se bae hem i stat blong ribuildum ol helt fasiliti long ol Saeklon Harold afekted provins long nekis manis.

Director General blong Ministry blong Health, Russel Tamata, i talem se bae oli riperem bak everi helt fasiliti mo helt senta we oli bin damej long taem blong Saeklon Harold.

“Mi mas talem olsem se fulap long ol dispenseri mo helt senta ia oli bin bild long taem bifo i kam mo oli no saeklon standard. So wanem we bae i hapen bae mifala i ribildim bak olgeta ia long standard strakja we mifala i gat,” Mr Tamata i talem.

Hem i talem se fulap long ol helt fasiliti ia oli no bild blong stanap akensem ol strong saeklon.

Mr Tamata i talem se mbe wetem rebuild projek ia, bambae everi helt fasiliti ia i rebuild wetem kapasiti blong stanap akensem ol strong saeklon long fiuja.

Mbe rebuilding i no save hapen nomo witaot sapot blong ol aid dona.

Minister blong Health, Silas Bule, i appriciatem tumas wok we ol aid dona oli bin mekem from bae hemi benefitim life blong ol pipol.

Minister Bule i talem se sam long olgeta helt fasiliti ia oli bild witin long 1950s mo 60s vinis, i mekem se oli olfala mo taem we saeklon i kam olsem Harold mo Pam, hem i rili distroem gud ol bilding ia.

“So as yumi bild naoia i ko, yumi stap bild wetem tinktink blong ol bilding ia oli moa strong mo resilient mo oli save stanap akensem eni kategri faev saeklon,” Minister Bule i talem.

Long taem blong Saeklon Harold fulap long ol helt fasiliti oli bin damej gud long Sanma mo Penama Provins.

I gat ol temporari fasiliti long ol afekted eria ia we oli stap blong givhan long ol patient kasem taem Ministry blong Helt hem i bildim ol permanent mo strong bilding stat long nekis manis.

(Visited 15 times, 1 visits today)

About The Author

You might be interested in