Moa help i kam outsaed

Wan Australian Airforce plen i kasem Vanuatu long wik ia wetem moa medikol saplae blong COVID.

Director General blong Ministry blong Health, Russel Tamata i talemaot long National TV tete.

Australia i bin sapot vinis long 10,000 COVID stik, 13,000 Rapid Antigen test, 60 oxygen concentrators, gloves, gowns, face masks, pulse oximeters, thermometers mo hand sanitiser.

Mr Tamata i talem se flaet ia i tekem sam Ni-Vanuatu we oli stap long Fiji, Australia mo ol nara pacific kaontri blong help long COVID.

VBTC Nius i kasem toksave se 14 long olgeta i kam long flaet ia.

“Yumi kat ol tim blong voluntia; i kat tri Dokta, wan nurse wetem wan Biomedical engineer blong supervisem mo konektem ol equipmen long hospital,” Mr Tamata i talem.

“I kat 20,000 dos blong astrazeneca tu long flaet ia. Yumi kat ol Personal Protective Equipment(PPE), ol oxygen masin mo ol nara medikol saplae.”

Wan New Zealand Defense Force flaet blong C130 aircraft bae i lan long Port Vila long tumoro wetem ol saplae blong ova 12,000 Rapid Antigen Test kits.

Mr Tamata i talem se oli rikwestem ol CPAP masin blong pulum win wetem sam moa nara medikol saplae.

New Zealand High Commissioner, Her Excellency Nicola Simmonds i bin talem long toktok blong hem se bae oli helpem Vanuatu long ol health nid we hemi kat.

Mr Tamata i talem se Vanuatu i putum wan peimen vinis i ko long UNICEF(United Nations Children’s Fund) blong 40,000 antigen tes kits. Mo tu toktok wetem DFAT blong moa tes i kam.

“Yumi bin putum wan rikwes i ko long China mo hem tu i stap pripea blong kam,” Mr Tamata i talem.

“Yumi bin askem 188,000 N95 mask. Yumi kat Surgical medium size, glowns mo shoe cover we bae yumi yusum long hospital.”

Hemia nao sam oda we yumi kasem long wik ia mo ol nara dei i kam.

Mr Tamata i talem tank yu long Leon Hardware, Vanuatu Interchange Limited mo Au Bon Marche long kontribution blong sapotem ol wokman mo olgeta we oli stap insaed long kwarentin.

Hemi talem se sapot we i kam i bigwan, ol financial sapot MFAT, DFAT, Chinese kavman tru emergency fund we i mekem se program i ko hed gud.

“Talem tank you tumas long bihaf long kavman long sapot sins stat blong March,” Mr Tamata i talem.

“Kes long vila mo Santo i stap inkris mbe bigfala achievement hemi nokat eni kes i ko long ol nara eria.”

Mr Tamata i talem se oli welkamem eni kontribusen blong sapotem kavman long taem olsem.

New Zealand i bin givim in faev niu masin blong oxygen.

 

 

(Visited 467 times, 1 visits today)

About The Author

You might be interested in