Hemi legol blong kontes long difren provins

Electoral Ofis i talem se hemi folem loa sapos wan man difren aelan i wantem kontes long nara provins.

Deputy Principal blong Electoral Ofis, Gary Tavoa, i talem toktok ia folem plante komplen abaot ol man difren aelan we oli wantem kontes long Shefa provincial eleksen long wik ia.

Hemi talem se hemia i stap long loa blong kaontri espeseli long constitution o mama loa.

“Sapos yumi lukluk gud long mama loa blong yumi, mama loa i givim sam fandamental raet long sam citizen we hemi inkludim raet blong laef mo fridom blong muvmen,” Mr Tavoa i talem long VBTC Nius.

“Plante taem pipol i muv from oli wantaem wan jenis olsem blong kat wan gudfala laef mo living.

“Eni persen we i rijista long wan polling station blong Efate hemi kwalifae blong kontes.

Area Secretary blong North Efate, Sylvie Ala, i talem se hemi glad long stand we Jif Kwanusori Marua Joe Karu Karumene blong Tanna i mekem from we i some rispek mo honesti long ol jif blong Efate.

Jeaman blong Vaturisu Council blong ol Jif long Efate, Jif Simeon Poilapa, i bin talem se council hemi rispektem constitutional raet blong wan man mbe hemi askem blong oli lan long exampol we Jif Karumene i mekem.

Hemi talem se ol pipol we oli wantem kontes, oli sud step daon mo kivim sapot long ol candidate we oli ol stret man Efate.

“Council i biliv se oltaem i kat kastom mo kalja blong ol man Efate we ol graon mo risos oli serem wetem ol nara pipol blong ol difren aelan we oli mekem Efate i futja hom blong olgeta,” Jif Poilapa i talem.

“Mi askem ol pipol blong andastan mo kivim bak rispek i kobak long ol candidate blong Shefa olsem wan tru saen blong tru melaneisan tradition value, faith long God mo christian principle we i stap long mama loa.”

Jif Kwanusori Marua Joe Karumene blong Tanna, i talem sori mo askem ol pipol blong nara aelan blong rispektem nasara blong Efate.

Provincial eleksen blong Penama, Malampa, Shefa mo Tafea bae i hapen long wik ia.