Hevi ren i kosem flood long ol eria blong Efate

Ol komuniti memba blong Mele mo Melematt long Efate i talem se hevi ren long wik ia i kosem bigfala flood.

Wan memba blong Mele Maat vilij, Robin Homu, i talem se long eli moning long Tuesday wik ia, oli digim aot ol toti we i bin blokem drainage blong wota blong mekem se wota i no flo antap long mein rod mbe i pas long stret rod blong wota.

Hemi talem se Mele Cascade riva i bin ova flo mo wota i flo i ko klosap long olgeta haus we oli stap klosap long riva.

Kaloris Ova, wan komuniti memba blong Mele vilij, i talem se flood tu i tekem ples.

Hemi talem se ol pipol blong vilij ia oli bin help blong kliarem sam drenej we oli bin bildim sins 1942 from i bin fas.

“Resen mifala i traem blong kliarem hemi blong help from i kat sam haos we wota i ko insaed long olketa,” Mr Ova i talem.

“Mifala i traem blong help blong wota flo i nomo ko insaed moa.

“Mifala i no wok wetem eni masin mbe mifala i traem evri wei blong mekem se wota i flo gud.”

Mr Ova i talem se “Hemia i wan long olketa nid we ol othoriti i nid blong sitaon mo toktok raon long hem.”

“Oli mas faenem ol wei blong wota we i ko daon long solwota, rod blem i klia blong hem blong help mekem wota antap i flo gud nomo,” hemi talem.

“From plante taem, taem bigfala ren, ol doti i fas mo wota i flo i kobak antap long vilij.

“Mifala i stap yusum shavel mo sped nomo blong help blong mekem se flo blong riva i flo gud.

“Mi hop se ren ia i stop from sapos i stap kontinu bae mifala luk se bae kam wos nomo.”

Wan lokol blong North Efate, Joyline Firiam, i talem se bigfala ren ia i afektem ol pipol we oli stap travel long bus evri moning blong kam wok long town.

Hemi talem se sam bridge, riva i flo bigwan mo ol transpot i nosave rod krosem.

“Samfala bus oli mas wet blong ren i stop, riva i flo slo bakeken mo oli save krosem,” Mrs Firiam i talem.

“Mifala i bin wet longtaem blong ol riva i ron nomol bakeken blong save kam long town mo wok.”

VBTC nius i andastanem se i kat flood tu long sam eria long Port Vila.