I kat inaf vatu blong jenisim foren mani

Sam bank mo foreign exchange kampani i talem se i kat inaf vatu blong jenisim foren mani.

Western Union Vanuatu i talem toktok ia blong respon long wan sosol media post, we i talem se, i nokat mani long ol bank mo foren exchange kampani folem lok daon blong COVID-19, taem ol Recognised Seasonal Employer (RSE) i bin ko blong jensem ol New Zealand dolla i ko long vatu.

Western Union i klarifaem se olgeta i stap gat wan cash limit we oli save yusum long wan dei blong jenisim foren mani i ko long vatu.

Wan spoksman blong Western Union Vanuatu i talem se cash limit blong wan dei, i save kasem ova VT10 million nomo.

Mbe i gat plante RSE wokman we oli kam wetem ol bigfala amaon blong mani blong jenisim long wan dei.

Hem i talem se taem plante kastoma i kam wantaem wetem ol bigfala amaon blong mani, bae i no posibol blong Western Union i save jenisim everi mani blong olgeta long wan dei, folem cash limit ia.

Spoksman ia i talem se mbe hem ia i no minim se mani i vinis, bae ol kastoma i save kambak long nekis dei blong jenisim mani.

VBTC i toktok long sam bank long Port Vila mo oli talem se plante RSE wokman i bin ko pas blong jenisim  mani blong olgeta long bank.

National Bank blong Vanuatu i talem se hemi nokat komen long isiu ia mo seves blong hem i ko hed nomol.

ANZ Bank i talem se oli nokat eni problem wetem cash flow long bank.

VBTC i traem kasem ol nara bank mbe hemi no posibol.

Sam RSE wokman i talem se oli bin ko long Goodies Forex mo jenisim mani be hemi haf mani nomo from oli nogat inaf cash.

Wan RSE wokman i talem se hemi no bin save jenisim mani blong hem long Mandei long wan long ol Foreign Exchange Kampani ia from kampani i no bin gat inaf mani long dei ia.

Ol exchange rate blong Bred Bank long Australian dolla i ko long vatu hemi 78.18, New Zealand dolla hemi 72.06 mo US dolla 111.44.

Long ANZ bank, exchange rate blong tete long Australian dolla hemi 77.01, New Zealand dolla hemi 71.35 mo US dolla hemi 111.46.

Long National Bank, Australian dolla exchange rate i ko long vatu hemi 78.45, New Zealand dolla hemi 72.24 mo US dolla hemi 111.40.

Long Bank South Pacific, exchange rate blong Australian dolla hemi 77.7200, New Zealand dolla 0.0000 mo US dolla 110.7900.

Mbe rate hem i jenis long everidei.

Governor blong Reserve Bank, Simeon Athy, i talem se ol foren mani we i stap kam insaed long kaontri i gud tumas from i helpem bigwan ekonomi blong Vanuatu.

Hemi talem se ol foren curensi we ol Ni-Vanuatu seasonal wokman i stap tekem i kam long kaontri bae i end ap long Reserve Bank mo ol nara bank mo ko long ol banking system we bae hemi gud tumas.

“Taem ol wokman ia i jenisim ol mani i ko long vatu, oli spendem nao long plante samting olsem education, impruvum ol haos mo helpem ol family,” Mr Athy i talem.

“Mo hem ia hemi wan gudfala samting tumas from yumi stap tokbaot wan bigfala namba blong ol man ia we bae oli spendem mani ia.

“Mi stap luk sam gud saen vinis taem ol wokman ia oli stap spendem mani ia long kaontri.”

“Hemi talem se, “Yumi no mas forgetem se turism hemi wan nara fom blong foreign exchange mbe  hemi foldaon i stap mo bae i tekem sam taem blong i kambak from ol boda lok daon ia.”

Moa long 8000 Ni-Vanuatu oli stap ko wok long Australia mo New Zealand and long Pacific Labour Mobility Scheme.

(Visited 1037 times, 2 visits today)

You might be interested in