I nogat inaf spes long Port Vila Cemetery

Ol wok man blong Port Vila Cemetery i stap digim bak ol olfala grave blong berem ol ded man long hem from i nogat inaf spes.

Town Clerk blong Port Vila Municipal Council, Peter Sakita, i talem long VBTC se, “Hem i wan serious isiu naoia from grave yard i fulap mo oli stap digim bak ol olfala grave.”

Hem i talem se spes blong cemetery ia i stap kam smol from population i stap gro mo i gat hae namba blong ded long wan dei.

Hem i talem se oli stap berem araon tri ded bodi long wan dei.

Town Clerk ia i talem se cemetery act i givim wan period blong faev yia blong wan grave i save kipim bodi blong wan ded man. Mbe afta long faev yia period ia, council i kat raet blong digim bak mo yusum.

Wan long ol wokman blong municipal i talem se, “Hemi no luk gud taem mifala i stap dikim bak grave blong wan nara man. Mbe from spes i stap fulap long eria blong graveyard mo hem i wan jalens.”

Sam lokol i talem se kavman i mas act ariap blong mekem se Port Vila Town i kat wan niu cemetery from fasin blong digim wan nara grave hemi no stret.

Mr Sakita i talem se oli stap lukluk tu blong yusum ap parking space blong ol trak long Port Vila Cemetery.

Hemi talem se long ol taem i kam bae ol trak oli park aotsaed nomo taem oli kam blong berem wan ded bodi.

Mr Sakita i talem se Port Vila Cemetry i faenem wan 20 hectare graon vinis long Eratap eria long Efate mo bae i tekem plante taem blong oli wok long hem.

Hem i talem se hem ia hem i only pis graon we i mitim criteria blong stap olsem wan cemetery aot long 11 sites we council i bin identifaem.

Hem i talem se i gat ol nara opsen tu we oli stap lukluk long hem. Wan hem i blong ol ded bodi blong ol man nara aelan i mas kobak blong oli berem long hom aelan blong hem.

Mr Sakita i talem se narafala opsen hemi cremation o fasin blong bonem bodi blong ded man. Hem ia council i stap plan vinis blong wok wetem wan kampani ova sea blong introdusum.

Hem i talem se mbe Kavman bae i mas lukluk long opsen ia fastaem from i ko akensem kastom blong Vanuatu.

Mbe Vanuatu Christian Council i bin tok aot akensem fasin blong bonem bodi blong ded man.

Chairman blong Vanuatu Christian Council, Pastor Alan Nafuki, i talem se Bible i statem se “man i kamaot long dust mo bae i kobak long dust”.

Hem i talem se fasin blong bonem ded bodi hem i bin stap happen bifo long New Hebrides mbe i stop finis.

Pastor Nafuki i talem se ol bigfala kaontri ova sea oli stap yusum fasin ia from oli nogat inaf spes long graon blong berem ol ded man long hem mbe Vanuatu i kat plante graon i stap yet.

Hem i talem se i gat inaf graon long Efate we council i save faenem blong muvum cemetery i go long hem.

Mr Sakita i talem se kavman blong tedei i agri finis blong pem niufala graon long Eratap from i gat nid blong gat wan niu cemetery.

“Wanem mifala i stap wet long hem naoia hemi submission i ko long Council blong ol Minister blong acquirem spes ia,” hem i talem.

Director blong Department blong Local Authority, Leith Veremaito, i talem se sapos Council blong ol Minista i apruvum bae Ministry blong Lands i wok long proses blong securem graon ia.

Graon long Eratap hem i worth araon VT42 million.

(Visited 574 times, 1 visits today)

About The Author

You might be interested in