ICT i save help long developmen

Information Communication Technology i save impruvum laef blong ol pipol long seves developmen.

Toktok ia Prime Minista blong Vanuatu, Honoroble Bob Loughman, i talem taem hemi lonjem event blong Information Communication Technology long Luganville, Santo long eli wik ia.

Prime Minista Loughman i talem se infomesen technology long kaontri i kro kwiktaem tumas long pas 10 yia.

“Long taem tete, infomesen technology i kam antap bigwan mo plante man i kat akses long hem from komunikesen hemi fast mo kwik,” Prime Minista Loughman i talem.

“Paoa blong technology i save help impruvum laef blong ol pipol.

“Sapos pipol i yusum gud ol tul blong technology ia bae i save helpem hom, bisnis mo even prea laef blong olgeta.

“Mi biliv se infomesen technology i save kam olsem solusen blong yumi save ajivim ol prioriti blong kavman.

“Sapos kavman i tekem lid bambae hemi bustum engagmen blong private sekta blong developmen blong digital transformation long Vanuatu.”

Presiden blong Sanma Provins, Malmal Langi Tavui, i talem se technology i helpem bigwan blong karemaot ol seves i ko kasem daon long pipol.

Hemi talem se sanma provins i kat 11 eria council mo oli luk technology i help blong pasem mesej kwiktaem.

“Mifala i luk bigfala developmen long saed blong ol satellite disk we 3Link communication wetem Vodafone Vanuatu i mekem kominikesen i isi mo fast,” Mr Tavui i talem.

“Nekis step hemi blong kaonsel blong hem yumi stat blong yusum zoom technology long manis June blong ol miting blong olgeta.

Mayor blong Luganville Municipality, Peter Patty, i talem se municipal council i luk bigfala jenis long wei blong mekem bisnis long taon we hemi lukaotem.

Hemi talem se yus blong technology i mekem seves diliveri i kwik.

“Mi askem ol sitisen blong Luganville blong mekem gud yus long ol technology ia, “Mr Patty i talem.

“Evri dipatmen blong kavman mo ol patna blong hem i mas displeiem ol prodak blong olgeta mo yusum internet blong maketem.

“Information communication technology i kontribut long sakses mo develop blong ol bisnis haos tete sapos yumi lukluk gud.

Turnaot blong dei wan blong 2021 National ICT Day hemi gud tumas. Plante ICT stakeholder, school mo pablik oli atendem long tete.

Sam pipol long pablik i komen se hem i gud blong lanem arem plante information  about ICT mo hemi gud blong lukim se kavman i tekem event ia i kam long Luganville.

Theme blong 2021 National ICT dei hem i accelerating digital transformation in challenging time.

VBTC bae hemi ko hed blong provaedem infomesen long tu dei event ia long Luganville.

 

 

 

 

(Visited 137 times, 1 visits today)

About The Author

You might be interested in