Ifira Black Bird i karem blessing

Ifira Black Bird football club i karem blessing long Presiden blong Republic blong Vanuatu, His Excellency, Nikenike Vurobaravu long tete moning.

Long toktok blong hem, hemi askem club blong ple wetem wan spirit blong mekem pipol blong Vanuatu i praod.

“So mi olsem Presiden, mi wantem talem olsem se ko plei football wetem God’s blessing, mo mi sua se bae stat long Torres i kam kasem long Aneityum we ol spirit blong ol apu blong yumi bae oli stap blong yumi mas plei blong win,” Mr Vurobaravu i talem.

Long wik ia tu i lukim evri jampion klab blong oceania oli taj daon vinis long kaontri from OFC champions league.

Las tim we emi kasem kaontri tete hemi Aspirae blong Tahiti.

Aukland City, Suva, Solomon Warriors mo Lupe Ola Suaga oli taj daon vinis long aelan blong Santo mo redi blong plei ol fes mats blong OFC champions league.

Long Sunday wik ia mbae grup B mats mbae i kik off long aelan blong Santo mo mbae i lukim difenda jampion club blong Oceania football Auckland city blong plei wetem Solomon Warriors Football Club.

Mats ia mbae i kik off stret long 12 oklok midel dei long Soka city stadium long Luganville bifo Lupe Ola Suaga mbae i plei Fiji jampion club, Suva Football Club.

Mo long Monday nekis wik mbae mbae i lukim long Port Vila long Freshwota stadium mbae Tiga sport blong New Caledonia mbae i fesem Aspirae blong Tahiti stret long 12pm bifo Jampion klab blong Vanuatu Ifira Black Bird football club hemi fesem PNG jampion, Hekary United Football Club.

Evry mats blong OFC jampions lik mbae oli live long Televison blong Vanuatu mo Radio Vanuatu.