Ifira Port Development mo Service Limited i kivim dividend long Kavman

Ifira Port Development mo Service CO Limited i handem ova VT eight million dividend blong hem i ko long Kavman long wik ia.

Chairman blong Ifira Port Development mo Service CO Limited, Chief Teriki Paunimanu Mantoi Kalsakau 111, i talem se sins long 2014, Ifira grup i stap givim aot dividend i ko long ol shareholder blong hem long everi yia.

Hemi talem se talem se totol blong dividend we hemi kivim aot sins 2014 kasem 2020 hemi VT 185 million.

“Aot long amaon ia, ova VT 90 million i ko long Kavman we hemi gat 49 percen shea insaed long Ifira Port Development mo Service Co Limited,”

“Mo ova 94 million i ko long Ifira Trustees we hemi gat 51 percen shea.

Prime Minister Bob Loughman, Deputy Prime Minister Ishmael Kalsakau mo Minister blong Finance, Johnny Koanapo i bin representem kavman blong risivim dividend ia.

Prime Minista, Honoroble Bob Loughman, i talem se hemi hapi from no mata long jalenj blong COVID-19 mbe Ifira Port Development mo Service CO Limited i save kivim dividend blong hem i ko long kavman.

Hemi talem se ol narafala fasiliti olsem NISCOL mo ol narafala inter – island wharf we Kavman i wandem luk se i wok olsem Ifira Port Development Service CO Limited.

“Mi enkarejem manejmen blong kampani ia blong meintenem gudfala gavanens oltaem we shareholder akrimen mo akt blong ol kampani I kat blong lukaotem gud bikfala investmen ia,” Prime Minister Loughman i talem.

Minister blong Internal Affairs, Honoroble Ismael Kalsakau i risivim tu dividend we Ifira Ports mo Development Co Service i kivim long Port Vila Municipal Council, Shefa mo Tafea provins.

Ifira Port mo Development Service Co Limited i givim tu smol vatu i go long 31 famili blong Ifira we oli stap olsem shareholder long kampani ia.

 

(Visited 203 times, 1 visits today)

About The Author

You might be interested in