Ol pipol we oli liv olbaot i mas karem raet-Jif

Ol jif i enkarej blong mekem sua se ol pipol we oli liv long eria blong olgeta oli karem raet long ol traditional lida.

Prime Minista, Bob Loughman i mekem toktok ia blong rispon long kwesten blong Efate Memba blong Palemen, Gillion William long ol eviksen oda long ol nara eria long Efate.

Prime Minista Loughman i talem se kes we kavman i helpem Waisisi eviksen long Efate hemi from olgeta i kat pat tu blong ple.

“Ating isu blong ol man i kam stap olbaot long ol customary graon o urban eria, hemi impoten blong ol jif i putum inples neseseri arenjmen blong save akomodetem ol residens we oli stap long eria ia,” Prime Minista Loughman i talem.

“Mo might long futja sapos kavman budget i alao, bambae hemi save lukluk long hem blong composentem pis graon we ol famili i stap long hem.

“Long wik ia, mi bin ansarem semak kwesten blong Memba blong Palemen blong Efate Rural, Jack Norris Kalmet abaot ol pipol long Waisisi long Efate; Mo mi bin talem toktok blong mi se olsem wan kavman i nid blong proaktiv, yumi no wet kasem difikalti i kam antap, afta yumi taem blong solvem long wan wei.

“Mo komuniti blong Mele -Waisisi, Mr Speaka, hemi lelbet difren from i kat ol agrimen we ol olfala bifo oli bin mekem anda long hem. Be sori tu blong luk se taem kavman i stap selektem ol site blong putum ol sanitary fasiliti we hemi projek blong kavman. Hemi ko putum wan long Mele-Waisisi we i kam anda long Wol bank, nao pas kavman hao hemi jajem hemi save se ol pipol ia oli no blong eria ia, mo olsem yumi save i kat ol nara bilding tu longwe. Ating oli(pas kavman) kat tinktink blong ol interfin sapos i kat eviksen oda.

“Hemia mi wantem mekem i klia se kavman i helpem olgeta be olgeta bae oli re-investem mani blong kavman. Wan percentage blong mani i kambak long kavman. Yumi save se oli bin kat dikasen wetem Lands ministry se sapos kavman i step in mo helpem olgeta. Olgeta tu i kat pat blong plei long hem. Mo mi bin talem tu se had taem blong faenem ol ples long ol eria blong town bambae i no vinis long Efate nomo, bae i ko long ol nara provins tu.

“Hemi impoten blong ol pipol ia oli kat laef olsem ol narafala. Nao sapos yumi talem se bae kavman i step in long evri pis graon long Efate rural mi no tink se hemia i stret blong yumi assume long wei ia.”

 

 

 

(Visited 45 times, 1 visits today)

About The Author

You might be interested in