Niu passport software system-Immigration

Immigration i stap wok long wan niu software passport system we bae i redi long six manis.

Director blong Vanuatu Immigration Services, Jeffrey Markson i talem toktok ia long wan Media Press Conferens tete.

Mr Markson i admitim se olfala computa software i slowem daon wok blong passport print mo bae oli wok had blong adresem.

“Long Septemba 13-14 bae i kat wan tri dei wokshop we bae Immigration mo International Organisation blong Migration i kondaktem blong tekem ol tinktink blong ol stakeholda long wanem software blong yusum,” Mr Markson i talemaot

“Afta long hem ia bae yumi ko long wan open tender; Yumi no wantem se bae yumi mekem long wan wei we bae yumi luk wan kampani nomo mo tekem hem i kam ale disaed afta se hemi no wok. So yumi mekem wan open tender blong karem plante aplikesen i kam insaed blong ko tru long proses blong tender blong kavman. Proses ia bae i tekem sam taem so mifala i stap push long taem period blong six manis. Hemi no isi be target ia nao. Afta long ol proses ia mi tink se bae i nid tu blong kasem palemen blong karem sam disisen.”

“Olsem director mi bin atendem Pacific island Director Forum miting mo toktok wetem ol nara fren blong mi blong luk wanem system nao oli yusum blong mi kat sam tinktink long niu software system ia.”

“Isu we i stap yumi luk pipol i kam in mo faenem se passport i no print long taem; Bigfala problem nao hemi software we yumi yusum blong printim passport,” Mr Markson i talem.

“Software we yumi yusum ia yumi karem bak long 2009 mo afta 10 yia yumi stil yusum. Pipol sapos oli lukluk gud yumi askem nomo birth certificate wetem foto ale yumi scanem putum long system be i kasem wan steij we hemi nomo wok kwik. So yumi mas apgredem. Dipatmen i toktok long man we i developem system ia be hemi nomo save apgred bae yumi nid blong karemaot mo putum long wan niu wan. Hemia from bae i kostem bigfala mani sapos yumi wok lem bakegen.”

Mr Markson i talem se system we oli stap yusum naoia hemi wan temporari arenjmen wan we Ofis blong Government Chief Information Officer wetem help blong ol lokol Information Technology(IT) Ofisa i trae had long las manis(July) blong kriatem spes long passport system ia blong yusum afta wet.

Hemi konfemem se i kat enaf buklet blong passport we hemi 30,000.

“Fraet blong yumi naoia se sapos yumi no manejem temporari arenjmen we ol IT i putum i stap bae yumi kat isu long hem bakegen; So prioriti naoia hemi urgent travel blong ol pipol we oli sik mo olgeta seasonal wokman blong pas tru long agent,” Mr Markson i talemaot.

Hemi talem se bae oli printim passport blong evri wan we oli pem fi blong VT10,000 taem system i stret.

“Wan miting we i bin hapen long Fiji, yumi bin rijistarem ius long forum mo yumi bin askem long ol fren blong yumi long pasific from ol mein transit eria olsem Fiji, Australia mo New Zealand blong oli save akseptem Certification blong Identity mo yumi tekem wan positiv rispon wael yumi wet. Nara arenjemen hemi blong extendem expiry deit blong passport sapos yu bin travel 3 taem nomo mo fulap pej i stap we i nogat stamp, be passport bae i expire, mifala i bin raet i ko long state law vinis mo sapos hemi stret bae mifala i isuem wan stamp nomo blong save extendem laef blem blong nara wan yia.

“Yumi wantem se taem yumi printim passport blong pipol be oli yusum blong travel wantaem folem isu we i stap so yumi yusum long emergency nomo.”

Plante lokol i komplen long pua seves mo immigration i akseptem.

“Yumi ofisioli risivim plante komen long social media mo akseptem mo yumi traem best blong adresem,” Mr Markson i talemaot.

“Naoia yumi stap wok tu blong impruvum ofis long Port Vila town blong save help long customer service.”

 

(Visited 1502 times, 1 visits today)

About The Author

You might be interested in