Inkris praes blong kakae

Price Control i talem se COVID mo inkris praes blong fuel from faet long Ukraine i mekem praes blong kakae i kohed blong ko antap.

Price Controller long Finance Ministry, Pacco Siri i talem long VBTC Nius long wik ia.

“Hemi no to do wetem ol saplae ovasi, olgeta goods ia, mbe hemi from freight blong ship we hemi karem ol goods i kam long Vanuatu. Long Wharf blong kasem ol shop long kaontri. Ukraine war ia i mekem praes blong fuel tu i ko antap mo ol faktor ia i nosave mekem ol praes i ko daon,” Mr Siri i talemaot.

International Moneytory Funds i talem se global economy we hemi stap rikava yet long COVID mo semak taem faet bitwin Russia mo Ukraine hemi putum wan lukluk we i no klia se wanem bae i hapen long Wol long futja.

Long seken kota blong yia, ripot i soem se oli revisem global growth blong yia ia long 6.1% i ko daon long 3.2% mo 2.9% long nekis yia.

Ripot i soem se Inited states pawa blong pem samting blong wan haos hemi ko daon bigwan mo ol Money policy hemi mekem growth long yia i bai i ko daon long 2.3% mo 1% long 2023.

China wetem ol lockdown blong hem i pusum growth i daon long 3.3%, we i slo long 4 decade.

Mo long Europe folem faet long Ukraine growth hemi ko daon long 3.6% mo 1.2% long neks yia, we i soem faet long Ukraine mo taet Moneytory polisi.

No mata long slo daon International Monetory Funds i pridiktim wan kontinu inkris blong praes long Fuel mo Energy.

Hemia loss long Purchaching power mo inkris praes blong ol samting. Komparem inkris praes long las yia 2021 hemi bin hae long 5.6% mo hemi ko daon bigwan long 2.7%. Ministry blong finance ripot i statem se se bai hemi inkris bageken long en blong yia ia.

Wan sto owna long Not Efate we i no wantem nem blong hem i kamaot, i talem se pipol we oli ownem ol shop oli mekem praes blong ol kakae i hae tumas.

“Tinfish Fiji long Wholesale stoa long Port Vila hemi VT234, taem ol shop owna oli tekem i kam long vilij, oli salem VT300-350; Hemia i sas tumas,” Hemi talemaot.

“So mi mas mekem wan smol kitjin stoa blong mifala long haos mo mekem ol praes i ko antap, hemi no helpem mi from mi no mekem tumas mani be mi traem blong helpem ol famili. So tinfish Fiji ia hemi praesem se VT250 nomo, mi adem smol mani nomo i ko. Mi luk se praes i ko antap, i ko daon i no balans nomo.”

Governor blong Reserve bank, Simeon Athy hemi bin talem se economy growth blong kaontri hemi depen bigwan long growth blong ol bigfala kaontri.

International Monetory Funds hemi talem se ol kaontri raon long Wol oli mas wok tugeta blong adresem isu ia.

“Russia invasion long ukraine i mekem inkris long ol enery mo kakae praes. inflation long yia ia i sapos blong kasem 6.6% invance ecomic 9.5% market mo stap longtaem,” Pirerre Oliver Gourinchas, International Monetory Funds Chief Economic mo Director Research Dipatmen i talemaot.

Mr Siri i talem se bae oli nid blong wok wetem Agriculture blong pipol oli mas planem moa lokol kakae.

Sam lokol we oli no wantaem talemaot nem i talem se lokol kakae tu i sas naoia mo ol otoriti i mas lukluk long ol praes.

Konsen hemi kontinu blong reis folem hae praes be wan plan long kavman long situesen ia i no kamaot yet.

 

 

(Visited 238 times, 1 visits today)

About The Author

You might be interested in