Kontinuous Air Vanuatu International flaet kanselesen blong ova faev dei i save mekem revenu loss blong VT 200-300 million we i afektem bigwa ol bisnis.
Chief Executive Ofisa blong Vanuatu Tourism Ofis, Adela Aru i talem long VBTC Nius se oli kasem plante komplen long wik ia long ol international kastoma from visit blong olgeta long Vanuatu i kansel.
“Taem yumi kat dilei blong ol flaet blong ova faev dei, potentiali hemi save kat loss blong VT200 -VT300 million long taem ia; Taem yumi lusum VT200 million long wan wik ia nomo, yumi save se plante bisnis i afek mo hemia i no minim ol tourism bisnis olsem ol hotel, resort mbe i kat tu ol pablik transpot bisnis olsem ol tour aktiviti, ol handicraft prodak blong yumi we oli salem ol Vanuatu Made goods so hemi wan chain. So conektviti hemi impoten,” Mrs Aru i talem.
March mo April hemi ol bisi taem blong ol airline from i kat easter mo skul holidei.
“Vanuatu Tourism Ofis i no provaedem wan direk asistens blong helpem ol stranded pasenja we oli stap long Port Vila from hemi wok blong national airline blong hemi lukluk long hao hemi save best fasilitatem seves long comfort blong wan kastoma from kastoma ia i pem seves blong national airline,” Mrs Aru i talem.
“Taem i kat flaet kanselesen hemi afektem bigwan nao ol booking blong wan kastoma wetem ol travel agent o nara tourism operator. Hemi luk nogud we yumi promotem Vanuatu olsem wan tourism destination mbe i stil i kat isu blong dilei blong flaet.”
Vanuatu Tourism Ofis i stap wok wetem Air Vanuatu blong manejem sam nogud toktok long Australia mo New Zealand maket folem ol post long social media we i save spoilem Vanuatu olsem wan tourism destination.
“Fulap oli kanselem ol booking i mekem se oli mas jensem ol destination blonmg olgeta we bae oli ko spendem holidei long hem; So mifala i mas wok hard wetem Air Vanuatu blong impruvum seves ia blong turis i save kontinu blong kam spendem holidei long Vanuatu.
Mrs Aru i talem tankiu long ol patna airline olsem Virgin Australia, Fiji Airways mo Aircalin we oli save help tekem ol pasenja we oli stranded i ko bak long destination blong olgeta.
I gat plante pipol i harem nogud from oli no save gohed wetem ol plan blong enjoyem gudfala weta long Vanuatu.
Vanuatu Tourism ofis hemi kontinu blong wok klosap wetem Air Vanuatu olsem wan key aviation from se Air vanuatu hemi karem bigfala shea blong ol international travela i kam insaed long kaontri.
Long nara developmen, Air Vanuatu hemi talem se ol part we hemi nidim blong repairem Boeing Aircraft oli faenem finis long Asia.
Long wan steitmen long wik ia, Airline i talem se igat posibiliti blong statem bak ol international flaet blong hem long midel blong neks week.
by Patience Mawa.
