Invest moa long agrikalja mo fisheries

I kat kol blong invest moa long agrikalja mo fisheries blong sastenem ekonomi.

Head blong State, His Excellency Pastor Obed Moses Tallis i mekem kol ia long Fes Ordinary Session long eli May.

Ps Tallis i talem se sekta ia i save sapotem kaontri long taem blong COVID taem we turis i nomo kam.

“So long humble view blong mi, mi wantem kavman invest moa long agrikalja mo fisheries. Mo yusum ol natural risos we hemi stap long graon mo solwota,” Ps Tallis i talem.

“Mi talem tank yu long kavman we hemi ridirektem fokas blong hem i ko long sekta blong agrikalja olsem kokonat planting, cattle restocking mo ol nara program.

“Mi apresiatem efot blong wok wetem ol cooperative blong ol lokol fama be i mas ko moa blong faenem ol potential fama we oli kat kraon mo interes long developmen.”

“Mi bin talem toktok ia bifo long wan sitting blong Palemen long 2018 bifo long pandemic se tourism hemi kontribut bigwan long growth blong ekonomi be onli problem se hemi nosave sastenem yumi long taem blong boda ristriksen from hemi limitim muvmen blong ol turis,” His Excellency Ps Tallis i talem.

“Yumi experiencem wan hae reit blong umemployment taem ol hotel i bin shut daon i kosem finansiol difficulti long fulap famili . Nara risen mi talem olsem hemi from ol climate change impak we i stap raon long Wol we i save afektem tourism industry.”

Ps Tallis i talem se i kat bigfala namba blong ol Ni- Vanuatu we oli pat long Labour Mobility Scheme long Australia mo New Zealand we i kontribut bigwan long ekonomi.

“I nogat doubt se mani we i kambak long kaontri i help bigwan. Ol seasonal wokman oli kambak wetem niu skil we i save help long wokfos long kaontri b kavman i no capjarem i mekem se oli kontinu blong kobak wok ovasi,” Ps Tallis i talem.

“Kavman i mas fokas long ol key seasonal wokman we oli wantem yusum ol niu skil we oli gainem blong developem akjikalja espeseli long ol farm we oli wok long hem olsem banana, pineapple, mo ol nara kakae wetem ol fruit tri we hemi gro long Vanuatu.”

Prime Minista, Honoroble Bob Loughman, i rispon se 2021 nasonal budget alokesen i ko antap long 21% blong sapotem prodaktiv sekta.

Hemi talem se kavman i sapotem developmen blong ol cooperative wetem VT200 million.

“Yumi aktivetem cooperative netwok tru long ol aelan blong yumi mo wok blong generetem pawa mo fuel,” Prime Minista Loughman i talem.

“Yumi sapot olgeta fama wetem VT150 million blong helpem praes blong copra. Kavman hemi givim wan nara VT150 million blong sapotem ol nara rut crop. Yumi asistem ol fama blong strengthenem Vanuatu Cooperative Business Network tru long wan grant blong konektem fama wetem maket. Long hem ia kavman hemi statem tu Indigieous Ni-Vanuatu Agro-Industry Council(INAC) blong patisipeit long ol bisnis mo kriatem inkam long ol fama. Wetem sapot blong European Development Fund11, agriculture ministry i wok wetem blong putum value long ol lokol prodak. Tru long ol program ia yumi luk ol expot blong ol rut crop i ko ovasi espeseli manioc we i ko long New Zealand Market.

“Tru long EDF11, yumi lonjem ol agrikalja sabsidy blong 60/40 mo 70/30 window blong sapotem ol Ni-Vanuatu oli kat akses long ol mechanikol tul.”

Hemi talem se Vanuatu Agriculture Rural Development Bank i kasem sapot blong VT1.5 billion blong helpem ol Ni-Vanuatu oli save karem loan wetem wan low interes reit.

“International boda bae i open long July mo kavman bae i lukluk bak long polisi blong mekem sua se hemi ko inline wetem prodaktiv sekta,” Prime Minista Lougman i talem.

“Polisi plan ia hemi blong wan Ni-Vanuatu i ownem, ranem mo benefit long yumi. Sam long ol developmen hemi lates jenis long Land Management act blong mekem sua se hemi sapotem manples blong kam olsem wan trak blong developmen.”

Kavman i anaonsem tu wan ministry blong Fisheries, Ocean mo Maritime we bae oli wok long hem.

 

(Visited 66 times, 1 visits today)

About The Author

You might be interested in