Investigation long jej gathering

Police bae i investigatem wan jej gathering we i bin hapen long Blacksands long Sunday.

Director General blong Health, Russel Tamata i talem long VBTC Nius se komplen i kasem Polis vinis.

“Oli brokem oda we i stap, ” Mr Tamata i talem.

“Mifala i toktok wetem Minista blong Health tete mo bae wok i ko hed blong prosecutum ol man ia. Polis bae i mekem investigation blong faenem tru stori. Be i stap long oda.”

Director Tamata i talem se i nogat eni rikwes blong jej seves long Blacksand.

Hemi se i bin gat wan rikwes blong yusum Convention Senta be Minista blong helt i bin advaesem ol organisa blong yusum wan miting online.

“Folem risk we i hae i stap, minista blong health i askem blong oli yusum online nomo,” Mr Tamata i talem.

“Be hemia long Blacksands i neva kat rikwes nomo,” Mr Tamata i talem.

Folem Public Health Act mo oda we i saen, i no mas gat eni gathering o assembly long taem naoia we kaontri hemi stap long level 3.