Investikesen i mekem ol Chinese pipol i stap pas long court

Investikesen long ol Chinese pipol long tufala fishing bot we ol othoriti i holem taet long Port Vila eli long yia ia, i soem se i kat enaf evidens blong pruvum se oli komitim ol strong aksen we i brekem loa.

Investikesen blong tufala Chinese fishing vessel ia hemi folem alekesen se ol Chinese pipol ia oli bin stap huk long solwota blong Vanuatu long eli yia ia.

Mo RVS Tukoro i bin arestem tufala long solwota blong Torba Provins.

Compliance Ofisa blong Fisheries Dipatmen, Iakar Silas, i talem se long investigation we oli bin karemaot i soem se i kat strong nid blong kes i ko hed.

“Ol ofens o aksen we ol Chinese pipol ia i komitim hemi strong from i kat enaf evidens blong pruvum,” hemi talem.

“Long stej ia bae yumi no save talem yet mbe lukluk i stap se bae i gat rikwes blong muvum kes i ko long Supreme Court.

“Bae Court nomo i mekem ruling beis long wanem mifala i priperem i ko long Ofis blong Public Prosecutor.”

Long wik ia, Magistrate Court i stat blong harem kes ia.

Mr Silas i talem se wok we tim blong investikesen i mekem i ko kasem Ofis blong Public Prosecutor i gud tumas.

“Kes file i stap wetem Public Prosecutor vinis mo fes court hearing i bin hapen long wik ia,” hemi talem.

“Kes i adjourn blong seven dei blong priperem Public Prosecutor i tekem kes i kambak long court bakeken.

“Mo hemia nao mi se ol evidens ia, lukluk i stap blong kes i pas long Magistrate Court.

“Join investiKesen we i tekem ples i stap bitwin Dipatmen blong Fisheries mo Police mo i tekem olketa klosap tri wik blong komplitim.

Director blong Customs Dipatmen, Harold Tarosa, i bin talem se spos i tru se tufala ship i brekem loa blong fisheries, i minim se i gat hae jans blong brokem loa from oli no rispektem loa blong boda kontrol mo State blong Emergency we i stap.

Hemi talem se i gat hevi penalti oli save imposem spos kot i faenem se oli guilti.

(Visited 351 times, 1 visits today)

About The Author

You might be interested in