Investikesen long cargo flaet blong New Caledonia

Pablik Seves Komisen i expek blong kivim wan ripot long nekis wik konsenem cargo flaet we i kam long 22 October long New Caledonia mbe i tekem 18 pasenja.

Hemia i wan kwik disisen we Council blong ol Minista i kamap long hem long wik ia folem tu COVID kes long kaontri.

Minista blong Climate Change, Honoroble Bruno Leingkon, i talem se hemi no bin awea long flaet ia mo ripot i sud kasem olgeta long Monday.

“Council blong ol Minista i mekem wan disisen blong jeaman blong Public Seves Komisen(Simil Johnson) i step in blong samonem ol memba blong COVID-19 tasfos mo kwestenem olgeta wan by wan se hao nao ol pasenja ia i kam long cargo flaet ia,” Minista Leingkon i talem.

“Disisin we i stap hemi blong flaet ia hemi wan cargo flaet nomo.

“Mi bin stap long Ambrym long taem ia we flaet ia i kam. Mi ko from Malampa dei selebresen mo taem mi kambak mi no awea long hem kasem long Monday we hemi nekis wik blem, mi kasem infomesen se sam man oli kam long flaet ia mo oli jes tes positiv long COVID long kwarentin.”

Minista Leingkon i talem se ol pipol we oli sapos blong apruvum ol flaet long taem blong COVID pandemic ia, hemi Director blong National Disaster Management Ofis (NDMO), Director blong Pablik Helt, mo Director blong Foreign Affairs.

Jeaman blong Pablik Seves Komisen, Simil Johnson, i talem se naoia hemi no risivim yet disisen blong Council blong ol Minista ia.

Mr Simil i talem se afta we bai hemi risivim disisen ia, komisen i gat ol proses blong folem long taem blong wan disisen olsem.

Hemi talem se proses i blong lukluk bak long disisen ia mo lukluk long hao oli save rispon long hem.

Long cargo flaet ia i gat 18 Ni-Vanuatu we i repatriate mo tu long olgeta i tes positiv long COVID long Sunday blong hem mo Prime Minista blong Vanuatu, Honoroble Bob Loughman, i mekem anaonsemen blong hem long eli wik ia.

Pablik Rilasen Ofisa blong Praem Minista, Fred Vurobabaru, i talem se kavman i stap investiketem from wanem ol pasenja oli karem pemisen blong kam long New Caledonia from hemi wan hae risk kaontri blong COVID-19.

Daerekta blong Foreign Affairs, Yvon Basil, i talem se Air Vanuatu flaet ia i sapos blong karem ol cargo nomo mbe oli sek se i gat sam pasenja long hem taem hemi kasem Vanuatu.

 

 

(Visited 932 times, 1 visits today)

About The Author

You might be interested in