Investikesen long faea -Kalapus

Investikesen i stap ko hed long faea we i bonem ol valuable asset insaed long storej cell blong Correctional Center long Port Vila long manis ia.

Director blong Correctional Services,  Johnny Marango, i talem se i kat samfala ofisa oli karem saspensen.

Hemi talem se damej blong faea i kost millions blong vatu.

Bigfala faea ia we hemi laet araon 4o’ klok long moning long taem blong hevi rain mo strong wind blong Saeklon Irene, i karem alegesen se i start long wan lighter.

Director Marango hemi pointemaot se i kat fasin we i lukim ol ofisa oli stap pasem ol item we i no alao i ko long ol prisina insaed long kalapus.

“Afta long faea we cell ia hemi bin bon, mifala i faenem tri (3) lighter,” Director Marango i talem.

“Mifala i faenem sam contraband insaed, mo mifala i faenem aot se i kat sam ofisa nao oli involv.”

Nomata se oli faenem ol lighter insaed long storage cell ia, i no klia iet se who nao i laetem faea ia o hao nao ia hemi stat.

Mbe Mr Marango i talem se i kat fes aksen i tekem ples vinis blong adresem olgeta ofisa we oli stap pasem ol lighter, cigarette mo marijuana i ko long ol prisina.

“Ol Ofisa konsen mifala i faenem aot se olgeta nao oli stap help blong apruvum mo karem ol marijuana mo ol samting ia i kam insaed,” Mr Marango i talem.

“Mi saspendem sam vinis las wik mo mbai oli fesem ful disciplinari we Public Service nao mbai lukluk long kes blong olgeta.”

Long taem blong inciden ia, wan prisina hemi yusum oportuniti ia blong ronwe long detention center taem se ful atention blong ol ofisa i stap long faea

No mata se oli faenem prisina ia long nekis dei, Mr Marango i talem se correctional seves i stap lukluk blong tekem ol step blong save stopem ol kaen insiden olsem long futja.

Director Marango i talemaot se mbai moa legal aksen i tekem ples taem se investigation hemi en.

By Agnes Herbert.

(Visited 3867 times, 1 visits today)

About The Author

You might be interested in