Investikesen long fail haos projek

Minista blong Justice mo Community Service, Honoroble Esmon Saimon i apointem wan grup blong mekem investiketem long fail projek blong low-kost haos blong National Housing Corporation mo International Green Structures long wik ia.

Long 2014, Vanuatu National Housing Corporation mo International Green Structures Limited i kat wan akrimen blong lokol kampani, GRD Corporations blong bilidim 2000 low kost mo sef haos bitwin 20 July 2015 mo 30 June 2016 mbe projek blong haos ia i neva hapen.

Minista Saimon, i talem se wan long ol prioriti blong kavman tete, hemi blong katem mo stopem korapsen mo hemia nao grup ia bae oli mekem investikesen.

Ol pipol we kavman i apointem olketa blong mekem investikesen long akrimen blong National Housing Corporation mo International Green Structure hemi, Henly Saul, Menzie Samuel, Michael Mangawai, Derek Alexander, John Killion Taleo, mo Marokon Aililee olsem ol komisina.

George Andrew i stap olsem Jeaman blong Commission, Stephen Tahi olsem Asesor blong commission mo Joe Ligo olsem Secretary blong komisen.

Minister Saimon, i talem se ol investikesen ia i mas vinis kwik taem.

“Yufala i stap tete blong statem wan wok we kavman blong tete i wantem se i vinis ariap mo i kat wan taem frame blong tri manis blong vinisim wok ia,” hemi talem.

“Kavman i wantem se mi olsem Minista blong Justice mo Minista blong Finance mo Economic Management i mas tablem ripot ia long Palamen long fes haf blong yia ia 2021.

“Kavman i kat trast long yufala blong mekem wok ia mo hemia nao mi apointem yufala.”

Jessy Dick, Fes Politikol Advisor blong Ministry blong Justice mo Community Service, i talem se, “International Green Structure i bin tekem kavman i ko long court from breach blong wan kontract mo insaed long hem, i kat wan atikol we kavman i bin breakem mo hemi winim kavman long court.”

Hemi talem se long kontrak we oli bin saenem ia hemi million blong vatu we i anda tekem wan haos projek, blong bildim ol low kost haos blong ol pipol afta long Saeklon Pam mbe akrimen ia i no bin wok aot.

“Mo kavman i mas pem ova VT 900,000 million long wan smol seksen blong breach blong kontrak ia,” Mr Dick i talem.

“Hemia i no stret from hemi mani blong pipol blong Vanuatu.

“Mo Minister blong Finance mo Economic Management, Honoroble Johnny Koanapo i bin riwestem blong i kat wan investikesen long proses blong kontract ia.

“Hemia nao investikesen ia bae i faenem aot hu ol pipol we oli bin involve long proses ia we i ko kasem signing blong kontract blong International Green Structure se hemi bin folem ol prosija blong kavman o no.”

Mr Dick i talem se intensen blong kavman hemi blong pem VT ova 900, 000 million ia mbe kavman i wantem anda tekem inquiry ia.

“So sapos kavman i ko blong pem, bae hemi mas tekem ol pipol we oli layabol from ol disisen ia i no ko tru long Council blong ol Minister o Palamen i apruvum olsem wan projek mani,” hemi talem.

“Mo hemia nao kavman i wantem pem mo sapos ol man ia oli involve bae oli kasem panishmen.

“Mo investikesen ia bae yumi yusum blong save tekem ol man ia i ko long court.”

Minista Saimon i talem se wan long ol prioriti blong kavman tete, hemi blong katem mo stopem korapsen long evri level blong societi,wetem Kavman mo ol institution blong hem.

Hemi talem se i kat ol investikesen we polis i stap andatekem naoia anda long niufala jenis blong Police Power Act mo ol pipol ia oli pat long hem anda long Commissions of Inquiry Act.

Ol swearing blong oath ia, Commissioner blong Oath, Tom Bethuel, nao i kondaktem long presens blong Minista Saimon, Acting Director General blong Ministry blong Justice mo Community Service, Johnny Marango.