Fake polis clearance investikesen

Investikesen long aktiviti blong fake(kiaman) polis clearance i stap ko hed naoia from i afektem visa blong ol wokman.

Commissioner blong Labour, Murielle Meltenoven i konfemem long VBTC Nius long tete se polis i stap mekem investikesen.

“Mifala i wok wetem Polis mo ol developmen patna blong adresem isu ia; Mata hemi stap long hand blong polis mo oli stap investiketem mo taem oli vinis bae oli sabmitim ripot i kam blong yumi infomem ol patna blong yumi,” Mrs Meltenoven i talemaot.

“Isu ia hemi afektem visa lodgemen blong ol seasonal wokman blong yumi so bambae hemi tekem taem from Immigration Australia i wantem mekem sua se ol infomesen we yumi sabmitim hemi stret infomesen we hemi tru.

“So long level blong dipatmen mi wantem apil nomo long ol license agent mo ol wokman we oli wantem stap patisipeit long Labour Mobility program we oli stap tinktink blong mekem wan pepa blong polis clearance, passport, Certificate blong Identity o medikol ripot blong karem long ol Lawful institution o ol otoriti we oli kat raet anda long loa, oli save isuem ol dokumen ia from sapos yumi no keaful bambae hemi save afektem patisipesen blong yumi long program mo yumi luk vinis we i slowem daon proses blong visa. ”

Mrs Meltenoven i talem se hemi nomo save talem moa infomesen from isu i stap long hand blong Polis.

Hemi talem se ripot nao bae i talem wanem nekis aksen blong oli tekem.

VBTC News hemi karem konfemesen long tu seasonal woka we oli talem se polis i tekem aot bageken police clearance ripot long tu nara woka bagegen from stamp we i stap long hem i no tru.

 

 

(Visited 3425 times, 1 visits today)

About The Author

You might be interested in