Investikesen long kiaman infomesen

COVID-19 Seaport Tasfos i talem se bae oli isuem investikesen blong faenem ol pipol we oli stap putum kiaman infomesen long social media.

Vice Chair blong Seaport Tasfos mo Shefa Public Health Manager, Obed Manwo, i talem toktok ia blong rispon long toktok we i stap ko raon abaot tu bigfala cargo ship we i stap long Santo se oli no folem stret COVID protocol taem oli kam insaed long kaontri. Mbe Mr Manwo i talem se tufala cargo ship ia i bin pas tru long wan arivol health kliarens long Port Vila bifo ko long Santo.

Mr Manwo i talem se bae oli wok kolosap wetem ol legal ofisa mo advaesa blong State Law Ofis mo even ko kasem National Disaster Management Ofis blong isuem sam investikesen long ol man we oli stap postem ol kiaman infomesen we i kriatem fraet.

“Seaport taskfos blong yumi i resem konsen blong hem from i no glad long ol kaen infomesen olsem ia,” Mr Manwo i talem long VBTC Nius.

“Long hu eva we i stap mislidim pablik tru long ol kiaman infomesen olsem i kriatem panik long level blong yumi antap i ko kasem level blong komuniti.”

Tufala ship ia i bin tekem kliarens feswan bifo ko long Santo. New Guinea Chief i ko long Santo blong ofloadem ol kontena .Nara wan hemi pas long Malekula bifo i ko long Santo blong tekem copra.

Vanua Sikon, Sanma Public Health Manager i talem se tufala ship ia i nokat sik long hem beis long ol infomesen we oli kat.

Mbe toktok long rod i mekem ol otoriti i panik from ship Niu Guinea Chief i bin kam tru long wan port(New Caledonia) we hemi stap olsem wan hot spot blong Delta Variant.

Mr Manwo i konfemem se oli bin aplaem COVID-19 protocol long tugeta ship.

Mr Manwo i talem se New Guinea Chief ship hemi folem protocol blong Vanuatu; hemi pas tru long wan arivol health kliarens, mo Disasta Ofis nao i kivim apruvol beis long ol advaes blong ol boda agensi ofisa wetem health.

Hemi talem se ol krew blong ship ia oli awea long strong protocol we Vanuatu i gat, we i minim se oli no alao blong gat kontak wetem eni man long soa.

Tim blong Santo i ranem wan trening wetem ol pipol we oli lukaotem wharf long NISCOL long Santo long hao oli save yusum ol ekwipmen olsem mesa long kaen situasen olsem.