Jalenj blong bonem bebe-West Vanualava

Ol mama long fo vilij blong West Vanualava long Banks Islands i ko hed blong bonem bebe long rod mo long canoe from pua netwok communikesen mo i nogat rod blong kasem Vetimboso clinic.

Area Secretary blong West Vanualava, Stephen Berth i talem long VBTC Nius se laef i had long rimot eria ia from oli kat tu banana bot nomo, mo taem netwok i nogat i had blong kasem ol mama we oli nidim health seves.

“Nara jalenj hemi fuel, fuel i nosave stap kasem taem we oli nidim blong karem ol mama i ko long clinic; “Yumi mas gat communication blong mekem se yumi save arenjem ol boat blong oli kam, be taem we i nogat netwok blong komunikeit i mekem se ol mama wetem ol papa oli wantem kam long clinic, oli mas pull long canoe nomo.

“Yumi no kasem klinic yet be ol mama i karem bebe vinis long rod o long canoe,” Mr Berth i talem.

Fo komuniti ia hemi Ambek, Lesah, Lion Bay mo Wasaga we oli stap narasaed long aelan.

“Samtaem weta i nogud, wind i strong mo ren i ren hemi rili hard; samtaem oli save nilim ol bag blong karem ol mama be from i longwe; yu mas wokbaot fo haoa blong kasem clinic, mekem se fulap long ol mama i stap karem bebe long rod nomo mo long canoe,” Mr Berth i talem.

“Rili laef i had tru.”

Hemi talem se seves blong ship i mas sevesem gud ol eria blong Vanualava.

“Sapos i nogat netwok coverage be i gat fuel hemi stap long graon blong transportem ol mama i ko long clinic bae i help bigwan.” Mr Berth i talem.

I kat nine komuniti long West Vanualava.

By Doddy Morris, trainee journalist.

 

 

 

 

(Visited 458 times, 1 visits today)

About The Author

You might be interested in