Moa konsolteisen long ritaemen age – Napuat

Jenis long ritaemen age i sud gat moa konsolteisen long hem, foma Internal Affairs Minista i talem.

Vanuatu Palamen i mekem jenis long ritaemen age we i bin stap long 55, naoia oli muvum i ko long 60. Palamen i mekem jenis ia mo pasem long yestete tru long Bill blong Statute Law (Miscellaneous Provisions) Act No. blong 2020, long Palamen Haus long Port Vila.

Mbe memba blong Palamen blong Tanna mo sem taem foma Minista blong Internal Affairs, Andrew Napuat, hemi talem se jenis long ritaemen age ia i sud kat moa konsolteisen long hem.

Hemi talem se jenis ia hemi sud folem laef ekspektensi blong ol pipol blong Vanuatu, weta oli helti i stap long age blong 60 blong save stap enjoem ol benefit blong olgeta.

“Yumi sud mekem konsolteisen long everi neseseri jenis we bae i afektem wok fos mo emploimen isu long Vanuatu,” Mr Napuat i talem.

“Wan long ol key samting ia nao hem i long saed blong extensen blong ritaemen age. Mi tink se yumi sud rili konsidarem hem ia wetem helt status mo karem ol medikol opinion we i save alawem yumi blong mekem ol jenis olsem.

“Mi save long ol nara kaontri oli bin extendem be from helt kondisen blong olgeta mo laef ekspektensi blong olgeta hem i difren long yumi long Vanuatu.

“Wanem we yumi nid blong pasem long ples ia bae hem i mas be releven long laef style blong yumi mo konteks blong yumi long Vanuatu.”

Deputi Praem Minista, Alatoi Ishmael Kalsakau, we hemi putum jenis ia i talem se risen blong i gat jenis ia hemi from ol developmen we kaontri hemi stap go tru long hem naoia.

Hemi talem se wetem helt seves we i stap long kaontri, i gat bigfala janis se man i save live longtaem.

“Infac yumi save plante pipol we oli save stap yet long seves. Olsem mi luk long las ritaemen ia ol soldia long Vanuatu Mobile Fos mo ol polis long Polis Fos oli save stap yet long duti be oli ritairem olgeta ariap,” hem i talem.

“So hem ia nao i mekem mi disaed mo kavman hem i agri.”

Deputi Praem Minista Kalsakau i talem se wetem smol salari we ol wokman oli stap risivim naoia, muv ia bae hemi alawem olgeta blong enjoem laef mo benefit we oli stap risivim.

Long kwesten se sapos jenis long ritaemen age ia bae hem i afektem ol yangfala we oli redi blong go insaed long wokfos.

Deputi Praem Minista Kalsakau i talem se “wan kavman bae hem i neva mas silip. I no se bae wok ia nomo bae yumi krabem koko bae i nomo naf long yumi. Yumi mas krieatem a lot moa wok wetem ol janis blong ol pipol i save laef long hem.”

Minista blo Finance, Johny Koanapo, i talem se hemi wan polisi blong kavman naoia blong lukluk long komitmen blong ol wokman espeseli long entitlement benefit blong olgeta.

VBTC i andastanem se bae niu jenis ia i kam into ifek taem we State Law hemi gazetem.

Olgeta kavman bill we i pas long palemen tedei mo yestedei hemi karem sapot blong 29 MP nomo afta we 22 MP blong oposisen oli saspen i stap. 22 Oposisen MP ia bae oli atendem bak Palamen long tumoro.

 

 

(Visited 1399 times, 1 visits today)

You might be interested in