Kampen blong distroem briding site blong kokonat bitel

Department blong Biosecurity i statem mass sanitation kampen blong distroem ol briding site blong Coconut Rhinoceros Beetle long Sandle Valley fam long Efate.

Senior Officer long Department blong Biosecurity, Touasi Tiwok, i talem se oli statem kampen wok ia long wik ia.

Hemi talem se kampen ia hemi impoten tumas blong evri wan i tekem responsibiliti blong helpem wok we dipatmen i stap mekem blong stopem spred blong Coconut Rhinoceros Beetle long Efate.

“ Coconut Rhinoceros Beetle Tim anda long dipatment blong biosecurity  i bin distroem ol rotin wud we oli foldaon insaed long fam ia,” Ms Tiwok i talem.

“ Tim i manej blong faenem sam long ol bitel ia mo samtaem aplaem biological kontrol long fankas trap we oli setemap long aria ia.

” Mo tu tim i faenem aot hao ol pipol i save faenem wan bitel insaed long wan fam.”

Ms Tiwok i talem se kampen ia hemi wan key tul blong ol pipol oli mas tekem responsibiliti blong klinim ol yard mo ol fam blong olgeta.

Hemi talem se semak wok blong mass kampen ia bae i hapen tu long ol nara aelan blong Vanuatu blong engarejem ol pipol long komuniti blong oli save moa infomesen abaot bitel ia.

“ Mi apil long evri pipol blong Vanuatu blong wok tugeta blong klinim gud ol yad mo fam blong olgeta, espesili nao distroem ol rotin wud we ol bitel ia oli save brid long hem,” hemi talem.

“ Wok blong stopem spred blong Coconut Rhinoceros Beetle hemi bisnis blong evri pipol mo i no Biosecurity nomo.”

(Visited 37 times, 1 visits today)

About The Author

You might be interested in